भांगरभूंय | प्रतिनिधी
बलिया, खबरां संस्था ः गंगेच्या देगणांत तीन म्हयन्यांच्या सर्वेक्षणा उपरांत युपीच्या बलिया जिल्ह्यांत भारतांतलो सगळ्यांत व्हडलो कच्च्या तेल सांठ्याचो सोद लागलो. स्वातंत्र्य सैनिक चिट्टू पांडे हांच्या कुटुंबाच्या जमनीचेर हो सोद लागलो. हो तेल सांठो जमनी सावन सुमार 3000 मीटर खोल आसा आनी ताचो विस्तार 300 किमी मेरेन आसूं येता असो अदमास ओएनजीसीन काडला. ओएनजीसीन पांडे कुटुंबा कडल्यान साडे स एकर जमीन तीन वर्सां खातीर भाड्यान घेतल्या. ताचे वर्सुकी भाडें 10 लाख रुपया आसा.
खणपाचें काम सुरू आसा. ताका दिसाक 25 हजार लिटर उदक जाय पडटा आनी हें काम एप्रिल मेरेन पुराय जावपाची शक्यताय आसा. तांकां येस मेळळ्यार बलियांतल्या सागरपाली ते प्रयागराजांतल्या फाफामाऊ मेरेन पातळिल्ल्या 300 किमी कच्च्या तेलाच्या पट्ट्यांतल्या हेर सुवातींनी अतिरिक्त बांय बोरींग खणतले.
तेलाचो सांठो आनी ओएनजीसीची भुमिका
एप्रिल 2021 मेरेन भारतांत कच्च्या तेलाचो सांठो 587.335 दशलक्ष मेट्रीक टन आशिल्लो असो अदमास उक्तायल्लो. तातुंतले मुखेल सांठे अस्तंत ऑफशोअर प्रदेश, आसाम आनी गुजरातांत आसात. १९५६ वर्सा स्थापन जाल्ल्या ओएनजीसीन भारताच्या तेल सोदपाच्या यत्नांचे फुडारपण करून भारतांतलें सगळ्यांत व्हडलें तेल क्षेत्र मुंबय हाय सारके म्हत्वाचे सोद लायल्यात. देशांतल्या कच्च्या तेलाच्या उत्पादनांत ताचो म्हत्वाचो वांटो आसा.
2024 वर्सा ओएनजीसीन देशी उत्पादन वाडोवपाच्या आनी आयात अवलंबन उणें करपाच्या रणनितीचो एक भाग म्हूण दर्यादेगेवेल्या पांच नवे तेल आनी वायू सोदांची घोशणा केली. बलियाचो सोद ह्या यत्नांक आनीक भर घालता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
