भांगरभूंय | प्रतिनिधी
संवसार पाडव्या निमतान समेस्त लोकांक भेटयलीं परबीं
पणजी : सुविधा आनी उदरगत हातूंत भारत देश चीनाचे खांदाक खांद लावन चलता. कांय काळा भितर भारत देश चीनाक फाटीं उडोवन संवसारीक महासत्ता देश जातलो. हाका लागून दरेका नागरिकाच्या योगदानाची गरज आसा, अशें मुख्यमंत्री डॉ. प्रमोद सावंत हांणी म्हणलें.
साखळे नव्या वर्साचे येवकार समितीच्या शोभा यात्रे उपरांत राधाकृष्ण देवळांत जाल्ल्या मेळाव्यांत ते उलयताले. साखळेच्या लोकां सयत राज्यांतले समेस्त जनतेक मुख्यमंत्र्यान नव्या वर्साचीं परबीं भेटयलीं. नव्या वर्साक दरेका नागरिकान कसलो ना कसलो नवो संकल्प करपाची गरज आसा. २०४७ मेरेन विकसीत भारत, आत्मनिर्भर भारत करपाचे प्रधानमंत्री नरेंद्र मोदी हांचें सपन आसा. हाचे वांगडाच आमकां विकसीत तशेंच स्वयंपूर्ण गोंय करपाचें आसा, अशें मुख्यमंत्र्यांनी म्हणलें.
गोंयांत आयज गोडेंमुता सयत हेर दुयेंसांचें प्रमाण वाडतूच आसा. मुक्ती पयलीं गोंयांत साखरे परस गोड चड वापरताले. कोणूय सोयरीं घरांत आयलीं काय साखरे बदला गोड आनी उदक दिताले. हालीं जेवणांत साकरेचें प्रमाण वाडिल्ल्यान गोडेंमुता सारकिल्लीं दुयेंसांय वाडल्यांत. हाका लागून भलायकेची काळजी घेवपाचो सल्लो मुख्यमंत्र्यान नव्या वर्सा जनतेक दिलो.
ह्या वेळार नवेंवर्स येवकार समितीचे वांगडी, विद्यार्थी आनी नागरीक हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
