भांगरभूंय | प्रतिनिधी
सद्याचे परिस्थितींत अमेरिका आनी नाटो देश जगांत आपलें वर्चस्व प्रस्थापीत करपा खातीर टॅरिफ बॉमाचो वापर करतना दिसतात. ताका लागून नाटो भारताक धमकी दिता की, रशिये कडलो वेपार थंबयात नाजाल्यार भारताचेर 100 टक्के टॅरिफ लायतले. टॅरिफाचे बाबतींत अमेरिका आनी नाटोन भारताक धमकी दिवची न्हय हाचे विपरीत परिणाम तांकांच भोगचे पडटले हेंवूय लक्षांत दवरूंक जाय. आयज संवसारांत वर्चस्वाच्या झुजांत अमेरिका आनी नाटो देश देंवल्यात आनी आपलें वर्चस्व प्रस्थापीत करपा खातीर अमेरिका आनी नाटो दरेक देशांचेर दबाव तंत्राचो वापर करीत आसात. जेणे करून हेर देशां मदीं भिरांतीचें वातावरण निर्माण जावचें आनी आपल्या चेपणा खाला रावचें.
रशिया हो भारताचो लागींचो इश्ट आसा आनी आसतलो ही गजाल जगाक लेगीत खबर आसा. तेचप्रमाण भारताचे अमेरिके कडेन लेगीत संबंद बरे आसात. पूण अमेरिकेची दोगली आनी सुवार्थी निती पळयत जाल्यार भारत अमेरिके पसून मात्सो सादुरतायेन रावता. कारण भारताचे कट्टर दुस्मान पाकिस्तान आनी चीन आसा. पूण भारताचें वाडत आशिल्लें वर्चस्व पळयत जाल्यार अमेरिका पाकिस्तानाक लिपचोरयां सगले तरेची मजत करता. ताका लागून भारताची वाडटी शक्त आनी संवसारीक संबंद पळयत जाल्यार अमेरिका आनी नाटो हांचे मदीं जलसीची भावना निर्माण जाल्या. ताका लागून भारताचे पांय ओडपा खातीर अमेरिका आनी नाटो रशिये कडलो वेपार थांबयात हे खातीर भारता सयत खूबशा देशांचेर दबाव तंत्राचो वापर करीत आसा.
युक्रेन आनी रशिया हांचे मदीं 24 फेब्रुवारी 2022 सावन झूज सुरू आसा आनी आतां हें झूज विनाशा वटेन चल्लां. ह्या झुजांत नाटो सयत अमेरिका युक्रेनाक पुराय झूज सामुग्रीची मजत करीत आसा. हाका लागूनच आयज युक्रेनाचें मनोबल वाडलां. पूण रशियेच्यो खुबश्यो अडचणी वाडटना दिसतात. कारण तांचेंय मानवी आनी वित्तीय लुकसाण व्हड प्रमाणांत जालां आनी जायत आसा. तरी लेगीत रशिया, युक्रेन आनी नाटोक जशाक तशी जाप दीत आसा. हेच फाटभुंयेर रशियाचें खच्चीकरण करपा खातीर नाटोन खर भुमिका घेतल्या आनी रशिया बराबर वेपार संबंद आशिल्ल्या देशांचेर नाटोची खर नदर आसा. ताका लागून रशिया कडेन लागसारपण आशिल्ल्या आनी वेपार करपी ब्राझील, चीन आनी भारत ह्या सारक्या देशांचेर खर निर्बंध घालपाची शिटकावणी नाटोचे सेक्रेटरी जनरल मार्क रूट हांणी 16 जुलय 2025 दिसा दिल्या. पूण मार्क रूटान अशें समजुचें न्हय की भारत नाटोक भियेतलो. भारत सर्वगूण संपन्न आसा, आनी भारत आपले गरजे प्रमाण उर्जा निर्मिती खातीर रशिये कडल्यान तेल विकत घेत आसता आनी घेत रावतलो. ताका लागून अमेरिकेन टेंशन घेवपाची गरज ना. कारण रशिया आनी भारत हांचे मदीं इश्टागतीचे संबंद आसात. ताका लागून अमेरिकेन भारताचेर चेपण घालपाचो यत्न लेगीत करचो न्हय. कारण रशिया-भारत हांचे मदीं खर इश्टागत आसा ही गजाल जगाक लेगीत खबर आसा आनी दिसून येत आसा. पूण अमेरिका स्वताच्या वर्चस्वा खातीर पाकिस्ताना सारक्या आतंकवादी राष्ट्राक मांडयेर घेवन डोनाल्ड ट्रम्प नोबॅल शांती पुरस्कारा खातीर भीक मागतना दिसून येता. पूण भिकाऱ्यांक दरेक देश भीक दितलोच अशें ना. सद्याचे परिस्थितींत डोनाल्ड ट्रम्प पुरायपणान सुवार्थी जाला आनी मनमानी करीत आसा. मानवी विचारांची हत्या करीत आसा. कारण ट्रम्प जगाच्याच न्हय तर तो स्वताच्या देशांतल्या लोकांचे नदरेंतल्यान लेगीत देंवला. नामनेचे उद्देगपती एलन मस्क हांचे बराबर लेगीत ट्रम्प हांचे खटकलां.
संवसारांतल्या खूबशा देशांतल्यान लाखांनी विद्यार्थी अमेरिकेंत शिकूंक वताले. पूण डोनाल्ड ट्रम्पाच्या हट्टाक लागून, मनमानी कायद्याक लागून आनी टेरिफाचो वाडटा तो भार पळयत जाल्यार संवसारांतल्या 70 टक्के विद्यार्थ्यांचो संबंद अमेरिके पसून तुटत आसा. म्हणल्यार डोनल्ड ट्रम्प आनी अमेरिका सरकार सगल्याच गजालींचेर तानाशाहचेर देंविल्ल्याचें दिसून येता. पूण अमेरिका एक गजाल विसरता. जें पाप आतां करीत आसा ताचें प्रायश्चीत तांकां भोगचेंच पडटलें. भारत कोणाकूच भियेना आनी भियेवचोय ना. कारण आमच्या ऊर्जा सुरक्षीतताये खातीर भारत 27 देशांतल्यान कच्चा तेलाची आयात करीत आसा. पूण वाडटी गरज पळयत जाल्यार हातूंत वाड जाल्या आनी भारत 40 देशां कडल्यान तेल आयात करीत आसा. ताका लागून रशिये वेल्या प्रतिबंधीत खंयचेय कारवायेची भारताक चिंता ना हाची जाण अमेरिकेन दवरची.
पुराय संवसाराक कल्पना आसा की अमेरिका धोकेबाज आनी सुवार्थी देश आसा. तो केन्नाय कोणाकूय धोको दिवंक शकता हाचीं खूबशीं उदाहरणां जगा मुखार आसात. अफगाणिस्तानाक रगताच्या कोंडांत सोडून अमेरिकेन अफगाणिस्तानांतल्यान पळ काडलो आनी हातूंत लाखांनी निरपराधांचे बळी गेले. हाका कारणीभूत अमेरिका आनी ऑगस्ट 2021त अफगाणिस्तानाचो ताबो तालिबानान घेतलो. तेच प्रमाण स्वताच्या सुवार्था खातीर युक्रेनाक अमेरिकेन झुजांत धुकल्लो आनी लाखांनी लोकांचो बळी गेलो आनी वचत आसा. अशे तरेन आयचे परिस्थितींत अमेरिका केन्ना कोणाचो घात करीत हें सांगूंक येवचें ना. ताका लागून जगातल्या सगल्या राष्ट्रांनी अमेरिका आनी मुखेलपणान डोनाल्ड ट्रम्प हांचे पसून सादू रावंक जाय. नाजाल्यार केन्नाय घात जावंक शकता.
प्रधानमंत्री नरेंद्र मोदी हांचो लागसारचो इश्ट समजतल्या डोनाल्ड ट्रम्प आयज भारताचो एक नंबरचो दुस्मान पाकिस्तानाक लागीं करता. हाचे वेल्यान आमी समजूंक शकतात ट्रम्प शांततायेचो पुरस्करतो नासून आतंकवाद्यांक मजत करपी आसा. सद्याचे परिस्थितींत डोनाल्ड ट्रम्प नोबॅल शांती पुरस्कारा खातीर मोट्या प्रमाणांत धडपड करीत आसा. भारत आनी पाकिस्तान हांचे मदलें झूज हांवें बंद केलें अशे ट्रम्प एकदां न्हय जाल्यार 24 फावटी सांगिल्ल्याचें जाहीर केलां. अशेंय म्हणटां की पांच झुजारी विमानां उडयलीं. पूण कोणाचीं तें मात सांगपाक तयार ना. भारत पाकिस्तानाक वेपार वेव्हार थांबोवपाची धमकी दिली तेन्ना झूज बंदी जाली असो दावो हालींच डोनाल्ड ट्रम्प हांणी केलो. हाचे वेल्यान स्पश्ट जाता की ट्रम्प उलयता एक करता दुसरेंच. आतां संवसाराच्या लक्षांत आयलां की डोनाल्ड ट्रम्प जो कितें खटाटोप करता तो फक्त नोबॅल शांततायेच्या पुरस्कारा खातीर. पूण ट्रम्प आयजूय नोबॅल पुरस्कारा पसून कितलोसोच पयस आसा.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
