भांगरभूंय | प्रतिनिधी
भारतान आयर्लेण्डा आडची पयली टी-20 मॅच डकवर्थ लुईस (डीएसएल) नेमा खाला दोन धांवड्यांनी जिखली. हांगाच्या मालाहायड क्लब मैदानाचेर येजमान आयर्लेण्डान भारता मुखार जैता खातीर 140 धांवड्यांची मोख दवरिल्ली. धांवड्यांचो फाटलाव करतना भारतान 6.5 ओव्हरींनी 2 विकेटी वगडावन 47 धांवड्यो केल्ल्यो, त्या वेळार पावस आयलो. पावसाक लागून खेळ मुखार जालो ना आनी भारताक डीएसएलाखाला भारताक जैतिवंत थारायलो.
यशस्वी जयस्वाल आनी ऋतुराज गायकवाड हांणी भारताक उत्कृश्ट सुरवात करून दिली. तांच्या नेटार भारतान बिनबाद 45 धांवड्यो केल्यो. पूण, डावाचे सातवे ओव्हरींत क्रेग यंगान भारताक दोन धपके दिले. पयलीं यशस्वीक बाद केलो. यशस्वीन 23 बॉलांनी 24 धांवड्यो केल्यो. हातूंत तीन चवके आनी एका सक्याचो आस्पाव आशिल्लो.
यंग हाणें उपरांत तिलक वर्माक बाद केलो. ताका खातें लेगीत उगडपाक जमलें ना. तिलक वर्मा बाद जाल्या उपरांत फकत दोन बॉलांचो खेळ जालो. संजू सॅमसन एकाचेर आनी गायकवाड 19 धांवड्यांचेर नाबाद उरलो. दुसरी मॅच 20 ऑगस्टाक जातली.
ते पयलीं टॉस हारल्या उपरांत पयलीं बॅटींग करपी आयर्लेण्डान एका वेळार 59 धांवड्यांचेर स विकेटी वगडायिल्ल्यो. पूण, कर्टिस कॅम्पर (39) आनी बॅरी मॅकार्थी (51) हांणी डाव सांबाळ्ळो आनी स्कोर 139 मेरेन व्हेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
