भांगरभूंय | प्रतिनिधी
भारतान इंग्लंडा आड चालू आशिल्ले दुसरे टॅस्टींतली आपली स्थिती घटमूट केली. चवथ्या दिसाचो खेळ सोंपलो त्या वेळार भारतान दिल्ले 608 धांवड्यांचे मोखीचो फाटलाव करतना इंग्लंडान आपल्या दुसऱ्या डावांत 3 विकेटी व्हगडावन 72 धांवड्यो केल्ल्यो.
ओली पोप 24 आनी पयल्या डावांत शेंकडो मारपी हॅरी ब्रूक 15 धांवड्यो करून खेळपट्टीचेर आशिल्लो. आकाश दीपान जो रूट (6) आनी बेन डकेट (25) हांकां बाद केले. जाल्यार एक विकेट मोहम्मद सिराजान घेतली. ताणें ओपनर जॅक क्रॉलीक (0) तंबूंत धाडलो.
भारतान आपलो दुसरो डाव 427 धांवड्यांचेर घोशीत केलो. रवींद्र जडेजान नाबाद 69 धांवड्यांची खेळी केली. मुखेली शुभमन गिलान 161 धांवड्यांचें योगदान दिलें. एके मॅचींत 400 धांवड्यो करपी तो पयलो भारतीय बॅट्समन थारलो. पयल्या डावांत ताणें 269 धांवड्यो केल्ल्यो. भारतान पयल्या डावांत 587 जाल्यार इंग्लंडान 407 धांवड्यो केल्ल्यो. अशे तरेन भारतान पयल्या डावांत 180 धांवड्यांची म्हत्वाची आघाडी घेतिल्ली.
मजगतीं, भारतान मॅचींत वट्ट 1014 धांवड्यो केल्यो. पयल्या डावांत 587 आनी दुसऱ्या डावांत 427 धांवड्यांचो आस्पाव आसा. टॅस्ट क्रिकेटींत भारतान पयले खेपे एके मॅचींत 1000 परस चड धांवड्यो केल्यात.
गिल हो एके टॅस्टींत सगल्यांत चड धांवड्यो करपी भारतीय मुखेली थारलो.ताणें विराट कोहलीचो 293 धांवड्यांचो भारतीय विक्रम मोडलो. कोहलीन 2017त दिल्ली टॅस्टींत श्रीलंका पंगडा आड केल्लो. कोहलीन पयल्या डावांत 243 आनी दुसऱ्या डावांत 50 धांवड्यो केल्ल्यो.
गिलान हे मॅचींत 430 धांवड्यो केल्यो. एके मॅचींत 400 धांवड्यो करपी तो पयलो भारतीय क्रिकेटर आसा. ताणें आदलो म्हान बॅट्समन सुनील गावस्काराक (344) फाटीं घालो. गावस्करान 54 वर्सां पयलीं 1971त वॅस्ट इंडिजा आड पोर्ट ऑफ स्पेनांत केल्लो.
तशेंच एके मॅचींत दोट्टी शेंकडो आनी शेंकडो मारपी गिल भारताचो दुसरो बॅट्समन थारलो. ताचे पयलीं सुनील गावस्करान 1971त वॅस्ट इंडिजा आड पोर्ट ऑफ स्पेनांत असो पराक्रम केल्लो.
मजगतीं, चवथ्या दिसा भारतान 1 बाद 64 धांवड्यां वयल्यान मुखार खेळपाक सुरवात केली. लोकेश राहुलाक (55) जोश टंग हाणें बाद केलो जाल्यार करुण नायर (26) हाका ब्रायडन कार्स हाणें बाद केलो. जाल्यार आक्रमक बॅटींग करपी ऋषभ पंत (65) हाका शोएब बशिरान तंबूंत धाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
