भांगरभूंय | प्रतिनिधी
भारताच्या दादल्यांच्या ज्युनियर हॉकी पंगडान जपान पंगडाक 4-2 फरकान हारोवन सुल्तान जोहोर करंड सर्तीची जैतान सुरवात केली. भारता वतीन आमिर अलीन 12व्या मिनटाक, गुरजोत सिंगान 36व्या मिनटाक, आनंद सौरभ कुशवाहान 44व्या आनी अंकित पालान 47व्या मिनटाक गोल केलो. जपाना वतीन त्सुबासा तनाकान 26व्या आनी राकुसी यामानाकान 57व्या मिनटाक गोल केलो.
भारताच्या सिनीयर पंगडाचो आदलो गोलकीपर आनी ज्युनियर पंगडाचो प्रशिक्षक पी आर श्रीजेश आपल्या खेळगड्यांच्या प्रदर्शनाचेर खोशी दिसलो. भारतान आक्रमक खेळ केलो. सुरवाती सावन गोल करपाच्या यत्नांत दिसलो. हाचो फायदो भारताक रोखडोच जालो. मॅचीच्या 12व्या मिनटाक आमिर अलीन मैदानी गोल केलो.
एका गोलान फाटीं पडिल्ल्या जपानान मॅचींत येवपाचो बरो यत्न केलो आनी ताका 26व्या मिनटाक येस लेगीत फावो जालें. त्सुबासा तनाकान बरोबरीचो गोल केलो. ते उपरांत जपानाक पयले खेपे मॅचींत आघाडी घेवपाची संद आशिल्ली. पूण, भारताच्या डिफॅण्डरांनी तांचो यत्न परतावन लायलो. मध्यांतरा मेरेन दोनूय पंगड 1-1 अशे बरोबरीचेर आशिल्ले. दुसऱ्या अर्दांत भारतान आनीक आक्रमक खेळ केलो.
फाटल्या म्हयन्यांत जाल्ले आशियायी चॅम्पियन्स ट्रॉफी वरवीं सिनीयर पंगडांत पदार्पण करपी गुरजोतान मध्यांतरा उपरांत स मिनटां भितर मैदानी गोल करून भारताक परतून आघाडी मेळोवन दिली. ते उपरांत आनंद कुशवाहान पॅनल्टी कॉर्नराचेर गोल करून भारताची आघाडी 3-0 अशी केली. भारतान निमाण्या क्वॉर्टरांत आनीक एक गोल केलो. अंकित पालान 47व्या मिनटाक मेळिल्ले पॅनल्टी कॉर्नराचेर रिबावण्डाचेर हो गोल करून भारताचें जैत निश्चीत केलें. राकुसी यामानाकान मॅच सोंपपाक कांय मिनटां बाकी आसतना जपाना वतीन दुसरो गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
