भांगरभूंय | प्रतिनिधी
अखेरच्या बॉला मेरेन रंगिल्ले मॅचींत येजमान वॅस्ट इंडिजाच्या पंगडान पयले टी-20 मॅचींत भारताक 4 धांवड्यांनी हारोवन पांच मॅचींचे माळेंत 1-0 अशी आघाडी घेतली. विंडीज पंगडान दिल्ले 150 धांवड्यांचे मोखीचो फाटलाव करतना भारताक 20 ओव्हरींनी 9 विकेटी वगडावन 145 धांवड्यो करप शक्य जाल्यो.
भारता वतीन पदार्पणाची मॅच खेळपी तिलक वर्मान सगल्यांत चड 39 धांवड्यांची खेळी केली. ताचे खेरीत सुर्यकुमार यादवान 21, हार्दीक पांड्यान 19 धांवड्यांचें योगदान दिलें.
एका वेळार भारत ही मॅच सहज हारतलो अशें दिसतालें. पूण, अर्शदीप सिंग, अक्षर पटेल हाणें सकयले सुवातेर बॅटिंगेक येवन धांवगती वाडयली. पूण, अखेरेक भारताक 4 धांवड्यो उण्यो पडल्यो.
वॅस्ट इंडीजा वतीन ओबेड मॅकॉय, जेसन होल्डर आनी रोमारियो शेफर्ड हाणें दरेकी दोन विकेटी घेतल्यो.
ते आदीं वॅस्ट इंडिजाचो मुखेली रोवमॅन पॉवेलान टॉस जिखून पयलीं बॅटींग करपाचो निर्णय घेतलो. निलोक्स पुरनाच्या 41 आनी रोवमॅनाच्या 48 धांवड्यां नेटार विंडिजान निर्धारीत 20 ओव्हरींनी 6 विकेटी वगडावन 149 धांवड्यो केल्यो.
ओपनर ब्रॅण्डन किंगान येना फुडें ताबडतोड शॉर्ट खेळपाक लागलो. ते उपरांत पांचवी ओव्हर घालपाक आयिल्ल्या युजवेंद्र चहलान पयल्या तीन बॉलांनी किंग आनी कायल मॅयर्स (1) हांकां बाद करून विंडिजाचे धांवगतीचेर अंकूश दवरलो. ते उपरांत कुलदीप यादवान जॉन्सन चार्ल्साक (3) बाद केलो.
हे मजगतीं, पुरनान एक बाजू सांबाळून धरतना ताबडतोड बॅटींग केली. ताणें 34 बॉलांनी 41 धांवड्यो केल्यो. हातूंत दोन चवके आनी दोन सक्यांचो आस्पाव आशिल्लो. ताका हार्दीक पांड्यान बाद केलो.
रोवमॅनान मुखेल्याक सोबा सारकी बॅटींग करतना 32 बॉलांनी 48 धांवड्यो केल्यो. ताणें तीन चवके आनी तीन सके मारले. शिमरोन हेटमायरान 12 बॉलांनी 10 धांवड्यो केल्यो. अखेरेक होल्डरान पंगडाचो स्कोर 149 मेरेन पावयलो. भारता वतीन अर्शदीप सिंग आनी युजवेंद्र चहल हाणें दरेकी दोन विकेटी घेतल्यो. हार्दीक पांड्या आनी कुलदीप यादव हांकां एकेक विकेट फावो जाली.
भारता वतीन तिलक वर्मा, मुकेश कुमार हाणें पदार्पण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
