भांगरभूंय | प्रतिनिधी
19वे आशियायी खेळाच्या 12व्या दिसा भारतान आपलें उत्कृश्ट प्रदर्शन कायम दवरलें. भारतान वट्ट पांच पदकां जिखलीं. हातूंत तीन भांगरा पदकांचो जाल्यार एका रुप्या पदकाचो आनी एका कांश्या पदकाचो आस्पाव आसा. अशे तरेन भारताच्या वट्ट पदकांची संख्या 86चेर पावली. हातूंत 21 भांगरा पदकांचो आस्पाव आसा. भारतान आपल्या ‘ऑल टायम बेस्ट परफॉर्मन्सा’क पयलींच फाटीं घाला. 2018तले आशियायी खेळांत भारतान आपलें सर्वोत्कृश्ट प्रदर्शन करतना 70 पदकां जिखिल्लीं. तातूंत 16 भांगरा पदकांचो आस्पाव आशिल्लो.
कालचें पयलें पदक तिरंदाजी खेळांत मेळ्ळें. तिरंदाजीच्या कम्पावण्ड फेरयेंत ज्योती सुरेखा, अदिती गोपीचंद स्वामी आनी परनीत कौर हे तिकडीन भांगरा पदक जिखलें. ते उपरांत स्क्वॉशांत दिपिका पल्लीकल आनी हरिंदर पाल सिंग हे जोडयेन मिश्र गटांत भांगर मेळयलें. दिसाचें तिसरें भांगरा पदक ओजस प्रवीण, अभिषेक वर्मा आनी प्रथमेश समाधान हे तिकडीन दादल्यांच्या कम्पावण्ड प्रकारांत मेळयलें.
अंतिम पंघलान बायलांच्या फ्री स्टायल 53 कील वजन गटांत कांश्या पदक जिखलें. भारताच्या सौरव घोषालान दादल्यांच्या स्क्वॉश एकोड्या गटांत रुप्या पदक जिखलें. फायनलींत ताका मलेशियाच्या एनजी इयान यो कडल्यान 3-1 अशा फरकान हार घेवची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
