भांगरभूंय | प्रतिनिधी
भारतान पयले टी-20 मॅचींत येजमान वॅस्ट इंडिजाक 68 धांवड्यांनी हारोवन पांच मॅचींचे माळेंत 1-0 अशी आघाडी घेतली. भारतान दिल्ले 191 धांवड्यांचे मोखीचो फाटलाव करपी विंडिजाक निर्धारीत 20 ओव्हरींनी 8 विकेटी वगडावन 122 धांवड्यो करप शक्य जाल्यो.
भारताच्या बॉलरां मुखार एकाय बॅट्समनाक तग धरपाक जमलो ना. ताच्यो थारावीक अंतरान विकेटी पडत गेल्यो. अर्शदीप सिंग, रवी बिश्नोई आनी आर आश्विन हाणें दरेकी दोन विकेटी घेतल्यो. भुवनेश्वर कुमार आनी रवींद्र जडेजा हांकां दरेकी एक विकेट फावो जाली.
मजगतीं, भारतान टॉस हारल्या उपरांत पयलीं बॅटींग करतना निर्धारीत 20 ओव्हरींनी 6 विकेटी वगडावन 190 धांवड्यो केल्यो.
मुखेली रोहीत शर्मान सगल्यांत चड 64 धांवड्यो केल्यो. जाल्यार अखेरच्या ओव्हरींनी दिनेश कार्तिकान जबरदस्त बॅटींग केली. ताणें फक्त 19 बॉलांनी नाबाद 41 धांवड्यो केल्यो. हातूंत चार चवके आनी दोन सक्यांचो आस्पाव आशिल्लो. ताची स्ट्रायक रेट 215.78 आशिल्ली. वॅस्ट इंडिजा वतीन अल्जारी जोसेफान सगल्यांत चड दोन विकेटी घेतल्यो.
मजगतीं, पयले खेपे आंतरराष्ट्रीय टी-20 मॅचींत डावाची सुरवात करपाक येवपी सुर्यकुमार यादवान फक्त 16 बॉलांनी 24 धांवड्यो केल्यो. श्रेयस अय्यर पुर्णपणान अपेशी थारलो. ताका खातें लेगीत उगडपाक जमलें ना. फॉर्मांत आशिल्ल्या हार्दिक पांड्या हे मॅचींत बरें प्रदर्शन करपाक जमलें ना. तो फक्त एक धांवडी करून बाद जालो.
हे मॅची खातीर भारतान आपल्या पंगडांत दोन बदल केले. 2021चे संवसारीक टी-20 सर्ती उपरांत पयले खेपे आर आश्विनाक निमाण्या इकरांत सुवात मेळ्ळी. ईशान किशनाची निवड करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
