भांगरभूंय | प्रतिनिधी
नवी दिल्ली, खबरां संस्था ः भारतांत 2023 वर्सा 30 टक्क्यां परस चड चलयो आनी 13 टक्क्यां परस चड चले 18 वर्सां पिराये पयलीं लैंगीक हिंसाचाराक बळी पडल्यात. द लॅन्सेट जर्नलांतल्या एका अहवाला प्रमाण, 1990 ते 2023 ह्या काळांत केल्ल्या अभ्यासांत संवसारांतल्या 200 परस चड देशांनी भुरग्यां आड लैंगीक हिंसाचाराचीं घडणुको वाडत आसात अशें दिसून आयलां.
चलयां आड जावपी चडशे लैंगीक हिंसाचार दक्षीण आशियांत जातात. बांगलादेशांत 9.3% चलयांचेर हिंसाचार जाता, जाल्यार भारतांत हें प्रमाण 30.8% इतलें आसा. संवसारात सरासरी 5 चलयां मदली 1 चली आनी 7 चल्या मदलो 1 चलो 18 वर्सां पिरायेच्या पयलीं लैंगीक हिंसाचाराक बळी पडटात.
लैंगीक हिंसाचाराक लागून मानसीक भलायकेचेरूय वायट परिणाम…
अमेरिकेंतल्या वॉशिंग्टन विद्यापिठांतल्या इन्स्टिट्यूट फॉर हेल्थ मेट्रीक अँड इव्हॅल्युएशनाच्या संशोधकांनी सांगलें, 18 वर्सां सकयल्या भुरग्यांचेर जावपी लैंगीक हिंसाचाराचें प्रमाण उपसहारा आफ्रिकेंत सगळ्यांत चड आसा. झिंबाब्वेंत हें प्रमाण सुमार 8% आनी कोट डी’आयव्होअर 28% आशिल्ल्याचें दिसून आयलें.
भुरग्यांचेर जावपी लैंगीक हिंसाचार ही सामकी गंभीर समस्या अशें अहवालांत म्हणलां. हाका लागून तांच्या मनीस हक्कांचो भंग जाताच तेच बरोबर तांच्या शारिरीक आनी मानसीक भलायकेचेरूय वायट परिणाम जाता. हाका लागून भुरग्यांचो मानसीक ताण, भंय आनी चिंता वाडूंक शकता आनी ताचो परिणाम तांच्या जिवीताचेर जावंक शकता.
लैंगीक हिंसाचार आडावपा खातीर जागृताय गरजेची…..
भुरग्यांचेर जावपी लैंगीक हिंसाचार आडावपा खातीर आनी लोकांक ताचे विशीं जागृत करपा खातीर योग्य आनी अचूक म्हायती खूब म्हत्वाची अशें संशोधकांनी सांगलें. 2023 वर्सा 18 वर्सां सकयले लैंगीक हिंसाचाराक बळी पडपी बायलांचो आंकडो सुमार 18.9% जाल्यार दादल्यांचो आंकडो 14.8% आशिल्लो अशें ह्या संशोधनांत दिसून आयलां.
संवसारभरांतल्या सुमार 70% बायलां आनी दादल्यांक भुरगेपणांत वा किशोरवयीन वस्थेंत लैंगीक हिंसाचाराक तोंड दिवचे पडटा. तशेंच जायत्या देशांनी ह्या विशयाचेर डेटाचो व्हड उणाव आसा. हे दिकेन बरे सर्वेक्षण आनी निरिक्षण करपाची गरज आसा अशें संशोधकांनी सुचयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
