भांगरभूंय | प्रतिनिधी
अमेरिकेच्या ‘सायन्स ऍडव्हान्सेस’ नेमाळ्यांतलो अहवाल: केंद्रान हो दावो न्हयकारलो
नवी दिल्ली, खबरां संस्था: सुमार अडेज वर्सां पुराय संवसार कोरोना महामारीन व्यापिल्लो. कोरोना व्हायरसाच्या संसर्गाच्या ल्हारांक लागून संवसारभर लाखांनी लोकांक मरण आयलें. कोरोना आड वेगवेगळ्यो लसी तयार जाले उपरांत निमाणें ही म्हामारी नियंत्रणांत हाडली. ह्या कोरोना महामारीचो परिणाम संवसाराक अजूनय भोगचो पडटा. मजगतीं एका अहवालाक लागून सध्या बोवाळ जाला.
‘सायन्स ऍडव्हान्सेस’ नांवाच्या अमेरिकन नेमाळ्यांत एक संशोधन अहवाल उजवाडाक आयला. हातूंत भारतांत कोरोनाक लागून जाल्ल्या मरणां विशीं एक टिप्पणी आसा. जातूंत २०२० वर्सा कोरोना व्हायरसाच्या काळांत ११ लाख ९० हजार जाणांक मरण आयिल्ल्याचो उल्लेख आयला. ह्या अहवालाक लागून भारतांतल्या केंद्र सरकाराचे भलायकी वेवस्थे कडेन बोट दाखयलां.
अहवालांत कितें सांगलां?
२०२० वर्सा कोरोना वेळार भारतांत ११ लाख ९० हजार लोकांक मरण आयलें. तशेंच लॉकडावन आनी कोरोना महामारीक लागून निर्माण जाल्ले परिस्थिती खातीर जायतीं मरणां नोंद जावंक नात असो दावो ह्या अहवालांत केला. भारतांत अधिकृत नोंदी परस आठ पटीन चड मरण आयिल्ल्याचोय दावो आसा. वेगवेगळ्या राज्यांतल्या वट्ट सात लाख ६५ हजार लोकांची म्हायती, २०१९-२० वर्साच्या जल्म-मरणाच्या आंकडेवारीच्या आदाराचेर हो अहवाल उजवाडाक आयला. २०२० वर्सा आयिल्ल्या मरणां मदीं बायलांचें प्रमाण चड आशिल्ल्यान ० ते १९ पिरायेच्या गटांत मरणां चड जाल्ल्याचो दावो केला.
केंद्र सरकारान हे आरोप न्हयकारले
केंद्रीय भलायकी मंत्रालयान हे आरोप पुरायपणान न्हयकारल्यात. सायन्स ऍडव्हान्सांत उजवाडाक आयिल्लो हो अहवाल चुकीच्या गृहीतकांचेर आदारीत आसा आनी अभ्यासा खातीर वापरिल्ले पद्दतींत गंभीर दोश आसात. नागरी नोंदणी प्रणाली (सीआरएस) वरवीं मरण आयिल्ल्यांचे आंकडेवारीची नोंद जाता, हातूंत कोरोनाक लागून मरण आयिल्ल्यांची नोंद ना. फकत कांय राज्यांच्या ल्हान आंकड्यां वयल्यान पुराय देशाचो डेटा काडपाक मेळना अशें भलायकी मंत्रालयान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
