भांगरभूंय | प्रतिनिधी
नवी दिल्ली, खबरां संस्था: गोंयांत जुलयांत घोग्यांनी पावस रकलो जाल्यार ऑगस्टांत वत आनी पावसाचो खेळ चालूच आशिल्लो. अशें आसलें तरी ऑगस्टांत देशभरांत सरासरी तापमान २४.२९ अंश सेल्सिअस इतलें आशिल्लें. १९०१ उपरांत अंदुंच्या आॅगस्टांत सगळ्यांत चड उश्णताय आशिल्ली, अशें भारतीय हवामानशास्त्र विभागान कळयलां.
‘आयएमडी’चे म्हायती प्रमाण, ऑगस्टांत देशभर सरासरी उण्यांत उणें तापमान २४.२९ डिग्री सेल्सियस नोंद जालां. हे तापमाना परस ०.६१ अंश सेल्सियस चड आशिल्लें. १९०१ उपरांत ऑगस्टांतलें हें सगळ्यांत उश्ण तापमान म्हणून नोंद जाली. ऑगस्टांत मध्य भारतांत आनी दक्षीण भारतांत रातचें तापमान खूब उश्ण आशिल्लें. मध्य भारतांत चडांत चड तापमान सामान्या परस ०.५५ अंश सेल्सियस (२४.२६ अंश सेल्सियस) आशिल्लें. तशेंच दक्षिण व्दीपकल्प भारतांत सामान्य तापमाना परस ०.७२ अंश सेल्सियस (२४.१२ अंश) आशिल्लें.
दक्षीण भारतांत ऑगस्टांत २०२.४ मिमी. (६.६ टक्के) पावस पडलो. मजगतीं, ह्या जाग्यार सरासरी उण्यांत उणें तापमान २४.१२ अंश सेल्सियस नोंद जालां. हेर वेळार सामान्य तापमान २३.४१ अंश सेल्सियस आशिल्लें. मध्य भारतांत ३५९.६ मिमी.(१६.५ टक्के) पावस पडलो. ह्या जाग्यार सरासरी उण्यांत उणें तापमान २४.२६ अंश सेल्सियस (२३.७१ अंश सेल्सियस) नोंद जालां. मजगतीं, अंदूं ऑगस्ट म्हयनो उदेंत आनी ईशान्य भारत आनी वायव्य भारतांत सगळ्यांत चड उश्णताय आशिल्ली अशें आयएमडीच्या अधिकार्यांनी सांगलें.
ऑगस्टांत चड पावसाची नोंद
ऑगस्टांत जायते कडेन बर्याच पावसाची नोंद जाली. मात, सेगीत धुक्याच्या वातावरणाक लागून उण्यांत उणें तापमान सामान्य तापमाना परस चड आशिल्लें. देशांतले चडश्या वाठारांनी, विशेश म्हळ्यार मध्य भारतांत सरासरी किमान तापमाना परस चड तापमानाची नोंद जाल्ल्याचें आयएमडीन म्हणलां. तशेंच फाटल्या स वर्सांनी भारतांतल्या ऑगस्ट म्हयन्याच्या पावसाची तुळा केल्यार अशें दिसून आयलें, २०१९ उपरांत २०२४ त म्हयनाळो पावस सगळ्यांत चड पडलो. तशेंच २०२१ आनी २०२३त पावस उण्या प्रमाणांत पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
