भांगरभूंय | प्रतिनिधी
नवी दिल्ली, खबरां संस्था ः जायत्या जाणांक खूब घाम येता. इतलो की रोखडीच पुराय कुड घामान ओली जाता. ही एक सामान्य समस्या, जाका वैजकी भाशेत हायपर हाइड्रोसिस (खूब घाम येवपाची समस्या) अशें म्हण्टात.
नोव्हेंबर 2019 वर्सा ‘इंडियन डर्मेटोलॉजी ऑनलायन जर्नल’त एक अभ्यास उजवाडाक आयिल्लो. ताचे प्रमाण, देशांतल्या एका नामनेच्या हॉस्पिटलाच्या कातीच्या ओपीडीक भेट दिवपी 832 कातीच्या दुयेंतींतल्या 17.9% दुयेंतींक हायपरहाइड्रोसिस जाल्लो. हाचे वयल्यान भारतांत हायपरहाइड्रोसिस ही एक सामान्य समस्या आसा असो निश्कर्श काडूं येता.
‘इंटरनॅशनल हायपर हायड्रोसिस सोसायटी’ हे संस्थे प्रमाण, संवसारभर सुमार 385 कोटी लोकांक हायपरहाइड्रोसिस आसा. हातूंत 18 ते 39 वर्सां पिरायेच्या 8.8% लोकांचो आस्पाव आसा.
हायपर हाइड्रोसिस म्हणल्यार कितें?
हायपर हाइड्रोसिस म्हणल्यार ‘कुडींतल्यान चड घाम येवप’. कुडीचें तापमान नियंत्रीत करपा खातीर चड घाम येता ताका हायपर हाइड्रोसिस म्हणटात. हे स्थितींत विसव घेतना, उठतना वा बसतना वा खंयचेंय काम करतना घाम येवंक शकता. घाम एक द्रव जो कुडीच्या एक्रिन ग्रंथींतल्यान (घाम ग्रंथी) भायर सरता. ह्यो ग्रंथी कातींत आसतात. घामाचें काम कुडीचें तापमान नियंत्रीत करपाक मजत करता. ग्रंथींतल्यान घाम भायर सरतकच तो द्रवांतल्यान बाष्पात बदलून कातींतल्यान ना जाता. हाका लागून आंग थंड जाता. उश्ण हवामानांत वा खंयच्याय शारिरीक हालचाली वेळार कुड स्वताक थंड करपाक घाम तयार करता.
लक्षणां
० पांयांच्या तळाक चड घाम येवप.
० अंडरआर्म्स, कपाल आनी गालांचेर चड घाम येवप.
० सदांच पुराय कातीचेर ओलसाण जाणावता.
० घामाक लागून कात जळजळप आनी खाज येवप.
० कुडींतल्यान घामाचो वास येवप.
० पांयांच्या तळाची कात फुटप वा सोलप.
हायपर हाइड्रोसिस कशें टाळचें
० सैल आनी सुती कपडे घालचें, जाका लागून घाम बेगीन सुकपाक शकता.
० नितळसाणेची नेमान जतनाय घेवची.
० ताण आनी चिंता उणी करपा खातीर ध्यान करचें.
० चड मसाल्याचें आनी तळिल्लें खाण टाळचें.
० बरी अँटीपर्पिरंट्स (घाम उणी करपी) उत्पादनां वापरात.
० गंभीर समस्या आसल्यार डर्मेटोलॉजिस्टचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
