भारतांत हायपरकोलेस्ट्रोलेमियाचो धोको वाडटा

भांगरभूंय | प्रतिनिधी

हाय कोलेस्ट्रॉल आंकडेवारींत गोंय 45.6% सयत दुसरें क्रमांकाचेर

नवी दिल्ली, खबरां संस्था ः भारतांतल्या एके पिळगेन व्यस्त जिणे पद्दतीक जुळोवपा खातीर आपले भलायके कडेन पुरायपणान दुर्लक्ष केलां. ह्या वेगान चलपी जिणेंत जायते जाण उरतात. पूण, तांची हीच संवय कळत-नकळत तांचे भलायकेचेर थेट परिणाम करपाक लागल्या. खावपा-पिवपाच्यो संवयी, चड वेळ एका सुवातेर बसप, उणो व्यायाम आदि गजालींचो भलायकेचेर आनी काळजाचेर थेट परिणाम जाता अशें दिसता. आतां हाचो परिणाम काळजाचेर नेमको कसो जाता? हीच म्हायती इंडियन हार्ट जर्नलांत उजवाडाक आयल्या.
भारतांतल्या उत्तर अस्तंत राज्यांनी रावपी नागरिकांक सध्या हायपरकोलेस्ट्रोलेमियाचो धोको वाडत आसा. म्हळ्यार मनशाच्या रगतांत बॅड कोलेस्ट्रॉलचे (Bad Cholesterol) म्हळ्यार HDL (high-density lipoprotein) प्रमाण वाडून ‘गुड’ कोलेस्ट्रॉलचे प्रमाण उणें जाता.
इंडियन कार्डियोलॉजी सोसायटी ऑफ इंडिया वतीन केल्ल्या ह्या निरिक्षणा प्रमाण वेगवेगळ्या भौगोलिक वाठारांतल्या व्यक्तींच्या आदारान ही म्हायती दिल्या. ह्या अहवालांत उक्ते जाल्ल्या आंकडेवारी प्रमाण देशाच्या उदेंत राज्यांनी 18.8 टक्के, अस्तंत राज्यांनी 29.2 टक्के, उत्तर राज्यांनी 28.2 टक्के आनी दक्षीण राज्यांनी 24.5 टक्के लोकांक हायपरकोलेस्ट्रॉलेमियाची समस्या आशिल्ल्याचें दिसून आयलां.

हायपरकोलेस्ट्रॉलेमियाचो धोको कितें?
हायपरकोलेस्ट्रॉल हें काळजाचे दुयेंस, स्ट्रोक आनी हेर जायत्या गंभीर दुयेंसांची सुरवात वा मुखेल कारण. धमनींत प्लाक तयार करपाचें आनी तातूंतल्यान रगताच्या प्रवाहाक आडखळ हाडपाचें धोक्याचे काम हायपरकोलेस्टेरॉल करता.

केरळांत हाय कोलेस्ट्रॉलचे प्रमाण चड
ह्या निरिक्षणा प्रमाण हाय कोलेस्ट्रॉल आंकडेवारीच्या मळार केरळ मुखार आसा, जंय सुमार 50.3 टक्के नागरिकां मदीं कोलेस्टेरॉलाची पातळी सामान्या परस चड आसा. ताचे उपरांत गोंय 45.6% सयत दुसरें क्रमांकाचेर आसा. आनी हिमाचल प्रदेश 39.6% तिसरें सुवातेर आसा.
उत्तर भारतांत फकत 29.1 टक्के नागरिकांच्या आंगांत गुड कोलेस्ट्रॉल आसता आनी उरिल्ल्या लोकसंख्येंत बॅड कोलेस्ट्रॉल आसता. ताचे उपरांत अस्तंत भारत (30.2%), दक्षीण भारत (23.5%) आनी उदेंत भारत (19.2%) हांचो क्रमांक लागता.