भांगरभूंय | प्रतिनिधी
कातीचेर तांबडेच, खरखरीत पट्टे आनी सेगीत खाज येवपी सोरायसीस हें दुयेंस भारतांत नेटान वाडटा, अशें भलायकी तज्ञांच्या निरीक्षणा वेळार मुखार आयलां. भारतीय कातीचो रोग सोसायटी आनी इंडियन जर्नल ऑफ डर्मेटोलॉजींत प्रकाशीत जाल्ल्या संशोधना प्रमाण, भारतांत सोरायसिसचें प्रचलन सुमार ०.४ टक्के ते २.८ टक्के मजगतीं आसा. गांवगिर्या वाठारांत दुयेतींचो आंकडो उणो जरी आसलो तरी शार वाठारांत, विशेश म्हणल्यार प्रदुशण, मानसीक ताण आनी जिणेशैलींतल्या बदलाक लागून हें दुयेंस नेटान पातळटा.
सोरायसीस हो एक ऑटोइम्यून दाहजन्य कातीचो रोग आशिल्ल्यान तो कांतीर बरोच काळ तिगून उरता. तो फकत कातीर मर्यादीत रावना. कांय दुयेतीं मदीं सोरायसीस हें सोरियाटीक आर्थ्रायटीस ह्या सांध्याच्या दुयेंसाचें रूप घेवपाक शकता. इंडियन जर्नल ऑफ डर्मेटोलॉजी (२०२३) च्या आंडेवारी प्रमाण, सोरायसीस आशिल्ल्या सुमार २० टक्के ते ३० टक्के दुयेतीं मदीं सांदे दुखपाचीं लक्षणां दिसतात, जाचो उपचार जावना जाल्यार कायमचे त्रास निर्माण जावपाक शकता.
भारतांत सोरायसीसचेर राष्ट्रीय पांवड्यार पुरायेन सर्वेक्षण आजूनय मर्यादीत आशिल्ल्यान नेमकी राज्यांची आंकडेवारी उपलब्ध ना. मात, एम्स, दिल्ली आनी पीजीआयएमइआर उत्तर भारतांत हें दुयेंस सुमार २.३ टक्के प्रौढां मदीं सांपडटा. जाल्यार दक्षीण भारतांत हो दर ०.४ टक्के ते १.५ टक्के इतलो आसा. तज्ज्ञांच्या मतान, हवामानांतलो फरक, आहार पद्धत, आनुवंशीक घटक आनी पर्यावरणीय परिस्थितीक लागून प्रचलनांत भौगोलीक फरक दिसता.
शारी वाठारांत मानसीक ताण, न्हिदेचो उणाव, प्रदुशण, सोरो पियेवप, सिगार ओडप आनी असंतुलीत आहार हे घटक सोरायसिसच्या लक्षणांक बय येता.
२०२२ वर्सा आयएडीव्हीएलच्या कातीच्या रोगाचो तज्ञांच्या सर्वेक्षणांत ६५ टक्के दोतोरांनी कोवीड-१९ महामारीच्या काळांत सोरायसीस दुयेतीं मदीं लक्षणां वाडिल्ल्याचें नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
