भांगरभूंय | प्रतिनिधी
नवी दिल्ली, खबरां संस्था ः देशांत मंकीपॉक्सचा (MPox) पयलो दुयेंती सांपडलो. केंद्रीय भलायकी मंत्रालयान सोमारा (9 सप्टेंबर) हाची म्हायती दिल्या. परदेशांतल्यान परतून आयिल्ल्या एका मनशाक 8 सप्टेंबराक मंकीपॉक्स जाल्ल्यान क्वारंटायन केल्ल्याची म्हायती मंत्रालयान दिल्या.
नमुने एकठांय करून तांची चांचणी केली तेन्ना मंकीपॉक्स स्ट्रेन वेस्ट आफ्रिकन क्लेड 2 आशिल्ल्याची खात्री जाली. पूण हो प्रकार डब्ल्यूएचओच्या जागतीक भलायकी आणीबाणींत आस्पाव केल्लो क्लेड 1 स्ट्रेन न्हय. 2022 वर्सा क्लेड 2 चे 30 दुयेंती सांपडिल्ले.
मंकीपॉक्स म्हळ्यार कितें?
मंकीपॉक्स हो विशाणू माकडां वरवीं मनशां मदीं पातळटा. ह्या विशाणुचो संसर्ग एका मनशा कडल्यान दुसर्या मनशाकूय जाता. संरक्षणा बगर शरिरीक संबंद दवरल्यारूय हो प्रसार जाता. मंकीपॉक्साची लागण जाले उपरांत जोर येता आनी पुराय आंगाक पुळेर येता. सुरवातेक पुळेर मुखामळार दिसता आनी उपरांत पुराय शरिराचेर. ह्या विशाणुची सुरवात आफ्रिकेंतल्यान जाली.
मंकीपॉक्सचीं लक्षणां
मंकीपॉक्स हो एक व्हायरस. मंकीपॉक्स जाल्ल्या दुयेंतीच्या संपर्कांत आयले उपरांत हें दुयेंस नेटान पातळटा. मंकीपॉक्स जाल्यार जोर आनी आंगार उदकाचे कशे फोड येतात. हातूंत तकली दुखप, आंग दुखपाच्योय समस्या निर्माण जातात.
संवसारीक भलायकी संघटनेन (WHO) बुधवारा एमपोक्स (Mpox) वा मंकीपॉक्स (Monkeypox) ही संवसारीक भौशीक भलायकी आणीबाणी अशें जाहीर केलां. 2022 त तेन्ना संवसारांतल्या 116 देशांनी एक लाखां परस चड प्रकरणां मुखार आयिल्लीं आनी 200 लोकांक मरण आयिल्लें. म्हत्वाची गजाल म्हळ्यार मंकीपॉक्साक लागून बायलां आनी 15 पिराये सकयल्या भुरग्यांक चड धोको आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
