भांगरभूंय | प्रतिनिधी
नवी दिल्ली, खबरां संस्था: भारतीयां खातीर एक खोशयेची खबर मुखार आयल्या. सध्या सगळो संवसार प्रदुशणाच्या चपक्यांत आसा. हाचो परिणाम हवामानांतल्या बदलाचेर जावपाक लागला. देखून सगळ्यांक सैमीक संकश्टाक तोंड दिवचें पडटा. संवसारीक उश्णताय ही एक हुस्को करपा सारकी गजाल आसतना भारता खातीर एक बरी खबर आसा. सरकारान हालींच जाहीर केल्ल्या ’इंडिया स्टेट ऑफ फॉरेस्ट रिपोर्ट २०२३’ प्रमाण भारतांतल्या रान आनी झाडांचो वाठार २०२१चे तुळेंत २०२३त १,४४५ चौरस किमीन वाडला. संवसार ग्लोबल वॉर्मिंगान हुलपतना भारतांत मात पांचवेचार वाठार वाडत आसात. केंद्रीय मंत्री भूपेंद्र यादव हांणी ही म्हायती दिल्या.
केंद्रीय मंत्री भूपेंद्र यादव हांचे हस्तुकीं देहरादून हांगच्या वनसंशोधन संस्था हांगा ह्या रिपोर्टचें प्रकाशन केलें. ह्या भारतीय वन सर्वेक्षणा (एफएसआय)वरवीं हो अहवाल तयार करतात. उपग्रह रिमोट सेन्सिंग डेटा आनी क्षेत्र-आधारीत राष्ट्रीय वनसूचीच्या आदारार देशांतल्या रान आनी झाडांच्या संसाधनांचें एफएसआय खोलायेन मुल्यांकन करता.
देशांत रान वाठार वाडटात
देशांतल्या रान वाठारांनी वाड जाल्या. २०२१चे तुळेंत देशांत वट्ट रान आनी झाडांच्या वाठारांत एक हजार ४४५ चौ. किमी वाड जाल्या. जातूंत रान वाठारांत १५६ चौ. किमी आनी झाडांच्या वाठारांत एक हजार २८९ चौ. किमी वाड जाल्या. ह्या अहवाला प्रमाण देशांतलो रान आनी झाडांचो वाठार ८,२७,३५७ चौ. किमी (देशाच्या वट्ट भौगोलीक वाठार २५.१७%) आसा. हातूंत रान वाठार ७,१५,३४३ चौ. किमी (२१.७६%), जाल्यार झाडांचो वाठार १,१२,०१४ चौ. किमी (३.४१%) आसा.
मजगतीं, देशभरांत रान वाठारांचें समाधानी चित्र मुखार आयलां. हातूंत मध्य प्रदेश पयल्या, अरुणाचल प्रदेश दुसरे आनी महाराष्ट्र तिसरे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
