भारतांत मोटसाण वाडटा

भांगरभूंय | प्रतिनिधी

‘द लॅन्सेट’ चो अहवाल जाहीर

सद्या लोकांचे जिणे पद्दतींत खूबच बदल जावपाक लागल्यात. जागरणां, खावपा- पिवपाच्या वेळांत बदल, कामाचो, अभ्यासाचो ताण आनी हेर जायत्यो गजाली जाका लागून लोकांच्या जिणे पद्दतींत खूब फरक जाणवता. व्यायामाचो उणाव, मोबायल वा संगणक स्क्रिनाचेर चडांत चड वेळ घालोवप ह्या सगळ्यांक लागून मोटसाणेची (लठ्ठपणा, Obesity) समस्या जाता. द लॅन्सेटान हे विशीं आंकडेवारी जाहीर केल्या.
हालींच ‘द लॅन्सेट’ हे संस्थेन एक अहवाल जाहीर केला. तातूंत आमचो भारत देश लठ्ठपणाच्या सापळ्यांत आडकला असो उल्लेख आयला. खास करून तरणाट्यां मदीं हाचें प्रमाण चड आसा, देखून फुडल्या वर्सांनी भारत मोटसाण आनी ताका लागून जावपी दुयेंसांचो त्रास सोंसपी लोकसंख्येचो देश जातलो असो भंय ह्या अहवालान उक्तायला. भारतांत हेर देशांचे तुळेन काळजाचे दुयेंस, स्ट्रोक आनी गोडेंमूत दुयेंस चड प्रमाणांत दिसून येतात. अशें स्थितींत मोटसाण वाडत जाल्यार ह्या दुयेंसांचें प्रमाण आनीक वाडूंक शकता. हे संबंदी केल्ल्या अभ्यासा खातीर 1990 पसूनची म्हायती वापरला. तशेंच 1990 वर्साचो डेटा आनी 2022 वर्साच्या डेटाची तुळा केल्या.
आंकडेवारी प्रमाण, भारतांत 1990 वर्सा मोटसाणेचें प्रमाण 1.2 टक्के आशिल्लें जें 2022 वर्सा 9.8 टक्क्यांनी वाडले. 1990 वर्सा दादल्यांच्या मोटसाणेचें प्रमाण 0.5 टक्के आशिल्लें आनी 2022 वर्सा तें 5.4 टक्क्यांनी वाडले. जाल्यार 1990 वर्सा चलयांचें प्रमाण 0.1 टक्के आशिल्लें जें 2022 वर्सा 3.1 टक्क्यां मेरेन वाडले. नॅशनल रिस्क फॅक्टर कोलॅबरेशन आनी संवसारीक भलायकी संघटनेच्या डेटाचें विश्लेशण करुन संवसारात भुरग्यां मदीं आनी नेण्ट्या भुरग्यां मदीं 2022 वर्सा मोटसाणेचें प्रमाण 1990 वर्साच्या प्रमाणा परस चार पटींनी वाडलें असो अदमास उक्तायला.

संवसारभर एक अब्ज परस चड लोक जाड…

‘द लॅन्सेटच्या’ अहवालांत उजवाडाक आयिल्ल्या जागतीक अदमासा प्रमाण संवसारभर एक अब्ज परस चड लोक जाड आसात. 2022 वर्साचे आंकडेवारी प्रमाण संवसारांत 88 कोटी प्रौढ आनी 15.9 कोटी भुरग्यांचो मोटसाणेंत आस्पाव आसा.

द लॅन्सेटच्या अभ्यासा प्रमाण, भारतांत 2022 वर्सा 20 वर्सां वयर पिरायेच्या गटांत 44 दशलक्ष बायलां आनी 26 दशलक्ष दादले जाड आशिल्ल्याचें नोंद जाला. जाल्यार 1990 वर्सा 24 लाख बायलां आनी 11 लाख दादले अशें हें प्रमाण आशिल्लें. तशेंच 2022 वर्सा 5 ते 19 वर्सां पिरायेच्या गटांत तब्बल 12.5 दशलक्ष भुरग्यांचें वजन चड आशिल्ल्याचें दिसून आयलें, तातूंत 7.4 दशलक्ष चले आनी 5.2 दशलक्ष चलयांचो आस्पाव आशिल्लो. हीच आंकडेवारी 1990 वर्सा फकत 0.4 दशलक्ष आशिल्ली. द लॅन्सेटाचो हो अहवाल हुस्क्याचो आसा. हें सगळें टाळपाक जाय जाल्यार समतोल आहार, व्यायाम आनी जिणे पद्दतींत फावो तें बदल करप गरजेचें.