भांगरभूंय | प्रतिनिधी
नवी दिल्ली, खबरां संस्था ः केंद्रीय गृहमंत्री अमित शाह हांणी ‘सहकार टॅक्सी’ येवजण जाहीर केल्या. ही सहकारी तत्वाचेर चलपी रायड-हेलिंग सेवा आसतली. मध्यस्थांचो आस्पाव टाळून ड्रायव्हरांक थेट फायदो दिवप हो हे सेवेचो हेत आसा. ही सेवा ओला आनी उबेर सारकिल्ल्या ॲप आदारीत रायड-हेलिंग कंपनींच्या मॉडेलांचेर आदारीत आसतली. सहकारी संस्थांक दुचाकी, टॅक्सी, रिक्शा आनी चार चाकी वाहनांची नोंदणी करपाक मेळटली. हो निर्णय ह्या मळार आशिल्ल्या ओला आनी उबेर सारक्या कंपनींक आव्हान निर्माण करतलें.
लोकसभेंत हे विशीं म्हायती दितना केंद्रीय गृह आनी सहकार मंत्री अमित शाह हांणी म्हणलें, “हो उपक्रम प्रधानमंत्री नरेंद्र मोदी हांच्या ‘सहकार्या वरवीं समृध्दी’ ह्या दृश्टीकोना कडेन संबंदीत आसा. फाटल्या तीन वर्सां सावन सहकार मंत्रालय ही येवजण चालीक लावपा खातीर सतत वावुरता आनी फुडल्या कांय म्हयन्यांत व्हड सहकारी टॅक्सी सेवा सुरू करतले, जाचो थेट फायदो ड्रायव्हरांक जातलो.”
ओला आनी उबेर सारक्या कंपनींची ॲप आदारीत टॅक्सी सेवांचेर मक्तेदारी आसा. हालींच ह्या कंपनींचेर भेदभाव करपी सेवा शुल्क घेतात असो आरोप जाल्लो. आयफोन आनी एंड्रॉयड वापरप्यां खातीर प्रवास भाडें वेगळें असो आरोप कांय जाणांनी केल्लो. ते उपरांत केंद्रीय गिरायक संरक्षण प्राधिकरण म्हळ्यार सीसीपीएन ह्या कंपनींक नोटीस धाडिल्ली.
उबेराचें स्पश्टीकरण
सोशल मिडियाचेर हे विशीं कांय पोस्ट व्हायरल जाले उपरांत उबरान हाचेर जाप दितना सगळे आरोप न्हयकारले. तशेंच गिरायक वापरता त्या फोनाचेर आदारुन भाडें थारायना अशेंय कंपनीन स्पश्ट केल्ले. पिकअप पॉयंट, येवपाक लागपी वेळ (ईटीए), ड्रॉप ऑफ पॉयंट हाका लागून भाडें वेगवेगळे दाखयतात अशें कंपनीन सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
