भारतांत बायलां आनी भुरग्यां खातीर खंयच्यो येवजण्यो चालीक लायल्यात….

भांगरभूंय | प्रतिनिधी

नवी दिल्ली, खबरां संस्था: बायलांची उदरगत, तांकां निर्णय घेवपाक आनी ते निर्णय मान्य करपाक मेळप, समाजांतली समानताय, पूर्वग्रहांची चौकट मोडून बायलां विशीं आशिल्ले गैरसमज पयस करप म्हळ्यार बायलांचें सशक्तीकरण अशी सादारणपणान व्याख्या करूं येता. बायलां सशक्तीकरणाची सुरवात जायत्या वर्सां सावन सुरू जाल्या तरी अजूनय बायलो आपले हक्क आनी समानताय मेळोवपा खातीर झगडटात.

१९ नोव्हेंबर २०१९ दिसा भारतांतल्या बायलां आनी भुरग्यां खातीर डिजिटल साक्षरता आनी ऑनलायन सुरक्षीतताय वाडोवपा खातीर बायलां आनी भुरग्यांच्या विकास मंत्रालयान फेसबूकाच्या सहकार्यान ‘वी थिंक डिजिटल’ नांवाची मोहीम सुरू केल्ली. बायलो आनी भुरगीं भारतीय समाजाचो म्हत्वाचो भाग आसलो तरी ते सगळ्यांत असुरक्षीत गट जावन आसात.

देखून बायलां आनी भुरगीं उदरगत मंत्रालयांतल्यान भारतांत उपलब्ध आशिल्ल्या बायलां सशक्तीकरण येवजण्यां विशीं ‘बायजूज’ हांणी दिल्ली म्हायती आमी आयज पळयतलीं. सरकारी परिक्षे खातीर आनी युपीएससी सारकिल्ल्या स्पर्धात्मक परिक्षे खातीरय ही म्हायती म्हत्वाची.

भारतांत बायलां खातीर आशिल्ल्यो येवजण्यो

बेटी बचाओ, बेटी पढाओ येवजण : २०१५ वर्सा आयिल्ले हे येवजणेंत लिंग-आधारीत गर्भपात आडावप, किशोरवयीन चलयांची सुरक्षितताय, शिक्षण आनी तांचें कल्याण सुनिश्‍चीत करप अश्या म्हत्वाच्या गजालींचेर लक्ष दितात.

वन स्टेप सेंटर स्कीम : ही येवजणूय २०१५ वर्सा आयल्या. हातूंत हिंसाचाराक तोंड दिल्ल्या बायलांची दखल घेतातत. हातूंत बायलांक हिंसाचाराची कागाळ FRI / NCR दाखल करपाक मजत करतात. तशेंच, पिडेस्त बायलांचें समाजीक आनी मानसीक समुपदेशन करतात.

बायलां हेल्पलायन सुविधा : ही येवजण २०१६ वर्सा आयल्या. हे येवजणे खाला हिंसाचारान पिडेस्त अश्या बायलांचे सुरक्षितताये खातीर तांकां २४ वरां टोल फ्री दूरसंचार सेवा दितात. इतलेंच न्हय गरजे प्रमाण पुलीस/हॉस्पिटल/ऍम्बुलन्स सेवा/जिल्हो विधी सेवा प्राधिकरण (DLSA)/संरक्षण अधिकारी (PO)/OSC अश्या सेवा संस्थांची मजत घेव येता. तशेंच पिडेस्त बायल जंय रावता वा काम करता अश्या सुवातांचेव उपलब्ध मजत सेवा, सरकारी येवजण आनी कार्यावळ हे विशींची हे येवजणे खाला दिता.

उज्ज्वला येवजण : २०१६ वर्सा आयिल्ले उज्ज्वला येवजणे खाला बायलां आनी भुरग्यांचें लैंगीक शोशण आनी तस्करी आडावपाचे लक्ष दितात. पिडेस्तांचें शोशण जावपी सुवातां वयल्यान सुटका करप, तांकां सुरक्षीत दवरप हें हे येवजणेचें ध्येय जावन आसा. तशेंच पिडेस्तांक जेवण, कपडे, घर, समुपदेशन, कायदेशीर मदत आनी मार्गदर्शन दिवप, तशेंच वैजकी उपचार आनी हेर गरजेच्यो गजाली दितले.

बायलां वस्तिगृह Working Women Hostel : १९७२-७३ आयिल्ले हे येवजणेंत कर्मचारी बायलां खातीर सुरक्षीत आनी वेवस्थीत घर उपलब्ध करपाचेर उर्बा दिता.

स्वाधार गृह SWADHAR Gruh : २०१८ वर्सा ही येवजण हाडली. हे येवजणेंत जेवण, कपडे, घर, वैजकी उपचार आनी संकटांत आशिल्ल्या बायलांची काळजी घेवप अश्यो मुळाव्यो गरजो पुराय करतात. तशेंच बायलांक कायदेशीर मजत आनी मार्गदर्शनूय दितात.

बायलांच्या प्रशिक्षण आनी रोजगार कार्यावळींक समर्थन : ही येवजण १९८६-८७ वर्सा आयली. रोजगार निर्माण करपाचे कुशळटायेचेर भर दिवपी ही येवजण. देशांतल्या १६ आनी ताचे परस वयले पिरायेच्या बायलांक हे येवजणेचो लाव घेवपाक मेळटा.

निर्भया येवजण : २०१२ वर्सा आयिल्ले हे येवजणे खाला बायलांक विवीध पांवड्यार सुरक्षितताय दिवपाचेर लक्ष दितात. हे येवजणेंत पिडेस्त बायलाञची वळख लिपयतात.

२०१६ ची नारी शक्ती येवजण: २०१७ ची बायलां शक्ती केंद्र, २०१६ ची बायल-ए-हात आनी बायलां पुलीस स्वयंसेवक अश्यो येवजण्योय राबयल्यो.

अश्यो जायत्यो येवजण्यो बायलां आनी भुरग्यांच्या संरक्षणा खातीर भारत सरकारान हाडल्या अशी म्हायती ‘बायजू’च्या एका लेखा वरवीं मेळटा.