भारतांत पावसाची स्थिती: गोंयां सयत बारा राज्यांनी घोग्यांनी पावसाची शिटकावणी
भांगरभूंय | प्रतिनिधी
उत्तर प्रदेशांत हुंवार, गंगेचे तीन घांट बुडले, गोरखपुरांत एनडीआरएफ तैनात
नवी दिल्ली, खबरां संस्था: उत्तर प्रदेशांतल्या खुबश्या जिल्ह्यांनी सप्तकभर हुंवाराची परिस्थिती कायम आसा. हुंवाराचो सगळ्यांत चड फटको गोरखपूर बसला. आतां मेरेन ५५ परस चड गांव उदका पोंदा गेल्यात. १०० बोटी तैनात करून लोकांक मजत आनी वाटावपाचें काम सध्या हांगा चालू आसा. एनडीआरएफ, एसडीआरएफ आनी पीएसी टिमूय तैनात केल्यात.
गंगा न्हंयेचेंय उदक वयर सरलां. वाराणसींतले गंगेंत ३० घांट बुडले. दशाश्वमेध घांटांतल्या गंगा आरतीचे सुवातेर उदक पावलां. अस्सी घांटाच्यो आदल्यो आरतीच्यो सुवातो बदल्ल्या. आयज आरती ४ फूट फाटीं आसतल्यो. दुसरे कडेन नेपाळाक तेंकून आशिल्ल्या बिहारांत हुंवाराची स्थिती तशीच आसा.
बिरेस्तारा मुंबय घोग्यांनी पावस पडलो. आयएमडी प्रमाण १० वरांनी (सकाळीं ८ ते सांजेवेळार ६ वरां मेरेन) १०१ मिमी पावसाची नोंद जाली. ह्या काळांत झाडां, वणटी पडपाच्यो जायत्यो घडणुको घडल्यो. मात कोणाक कांय जावंक ना. हवामान खात्यान आयज १३ राज्यांनी व्हडा प्रमाणांत पावस पडपाची शिटकावणी दिल्या.
गोंयां सयत हेर १२ राज्यांनी घोग्यांनी पावस
भारतीय हवामान विभागान (आयएमडी) शुक्रारा गोंय, महाराष्ट्र, तेलंगणा, कर्नाटक, आंध्र प्रदेश, गुजरात, छत्तीसगड, ओडिशा, मध्य प्रदेश, हिमाचल प्रदेश, उत्तराखंड, राजस्थान आनी हरियाणा ह्या राज्यांनी उटंगाराच्या पावसाची शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
