भारतांत पयलेच खेपे दिसलो युरोपीय रेड एडमिरल फुलपाखो

भांगरभूंय | प्रतिनिधी

धर्मशाला, खबरां संस्था ः हिमाचल प्रदेशांतल्या धर्मशाला शारांत इतिहासीक सोद लागला. युरोपीय रेड अॅडमिरल फुलपाखो हांगा पयलेच खेपे दिसला. फुलपाखो तज्ञ लवीश गरलानी हांकां थाथरना हिल टॉपाचेर 2500 मीटर उंचायेचेर तो दिसलो. गरलानी 2009 वर्सा सावन अस्तंत हिमालयाच्या वाठारांतल्या फुलपाख्यांचो अभ्यास करता.
युरोपीय रेड अॅडमिरल फुलपाखो उत्तर अमेरिकेंत आनी मध्य आशियांत मेळटा. दक्षीण आशियांत तो पयलेच खेपे 1929 वर्सा बलुचिस्तानांत पळोवंक मेळ्ळो. मागीर 93 वर्सां उपरांत 2022 वर्सा पाकिस्तानांतल्या चित्राल वाठारांत परतून तो दिसलो.
हो फुलपाखो इंडियन रेड अॅडमिरल सारको दिसता. पूण ताच्या वयल्या पांखांचेर खोल किरमिजी रंगाचो पातळ पट्टो आसता. इंडियन रेड अॅडमिरलांत ही पट्टी हलकी आनी रूंद आसता. युरोपीय रेड अॅडमिरलाच्या पांखांचेर एक खाशेलो दाग आसून तो भारतीय प्रजातीं मदीं दिसना.

बिच्चू बुटी ही वनस्पत अस्तंत हिमालयांत खूब प्रमाणांत मेळटा. हाकाच लागून हो फुलपाखो हांगा आयिल्लो आसूं येता. ह्या सोदा उपरांत हिमाचल प्रदेशांतल्या फुलपाख्यांची वट्ट संख्या 440 जाल्या अशें डलहौसी रान खात्याच्या भाटियाट रान परिक्षेत्राचे अधिकारी संजीव कुमार हांणी सांगलें. लविश गरलानी हांणी सांगलें, युरोपीय रेड अॅडमिरल हो भारतीय रेड अॅडमिरल आनी वनस्पतीचेर निंबून आसतात. फुडाराक ह्या वाठारांत चड खोलायेन सर्वेक्षण केल्यार उत्तराखंड आनी नेपाळ शिमेमेरेन ही प्रजाती मेळूं येता.

लवीश गरलानी कोण?
लवीश गरलानी 2009 वर्सा सावन हिमाचल प्रदेशांत फुलपाख्यांचो अभ्यास करता. ताचो प्रवास फोटोग्राफीच्या छंदान सुरू जालो आनी उपरांत तो फुलपाख्यांच्या संशोधनांतल्या करिअरांत रुपांतरीत जालो. सध्या तो हिमाचल प्रदेश रान खात्यांत तंत्रीक सल्लागार म्हणून काम करता, फुलपाख्यां संबंदीत प्रकल्पांनी तो सेवा दिता.