भारतांत दर वरांक 53 अपघात, 19 जाणांक मरण

भांगरभूंय | प्रतिनिधी

नवी दिल्ली, खबरां संस्था ः केंद्रीय रस्तो येरादारी आनी म्हामार्ग मंत्रालयान ‘भारतांतले रस्तो अपघात 2022’ ह्या विशयाचेर वर्सुकी अहवाल हालींच उजवाडाक हाडलो. ह्या अहवाला प्रमाण 2022 वर्सा देशांतल्या राज्यांनी तशेंच केंद्रशासित प्रदेश वाठारांनी वट्ट 4,61,312 रस्ते अपघात जाल्यात. तांतूत 1,68,491 जाणांक मरण आयलें जाल्यार 4,43,366 जाण जखमी जाल्यात. फाटल्या वर्साच्या आंकड्यांचे तुळेंत ह्या अहवाला प्रमाण, 2022 वर्सा अपघातांत 11.9 टक्के, मरणांत 9.4 टक्के आनी जखमीत 15.3 टक्के वाड जाल्ल्याचें दिसून आयलां.

1. वाहनां चड वेगान चलोवप हें मुखेल कारण
   2022 वर्सा वट्ट अपघातांतले 72.3 टक्के अपघात फकत वेगान गाडी चलयिल्ल्यान जाले. वेगाक लागून 71.2 टक्के मरण आनी 72.8 टक्के जखमी जाले. 2021 वर्साच्या वेगान गाडी चलोवन जाल्ल्या घडणुकांचे तुळेंत वट्ट अपघातांत 12.8 टक्के, मरण 11.8 टक्के आनी जखमी जावपाची संख्या 15.2 टक्क्यांनी वाडल्या. चुकीचे दिकेन गाडी चलोवप हें अपघाताचें दुसरें मुखेल कारण अशें अहवालांत म्हणलां. ताका लागून 4.9 टक्के अपघात जाल्यात.
2. चडशे अपघात सरळ रेशेंतल्या म्हामार्गांचेर
   अहवालाच्या आंकडेवारी प्रमाण, 67 टक्के अपघात सरळ रेशेंतल्या रस्त्यांचेर घडल्यात. ओल्तांचे रस्ते, फोंडकुलां आशिल्ले रस्ते, देंवती आशिल्ले रस्ते अशा रस्त्यां परस सरळ रस्त्यांचेर वा म्हामार्गांचेर चार पटींनी चड अपघात जाल्यात.
3. फाटल्यान धक्को दिवप सगळ्यांत सामान्य कारण
   2022 वर्साच्या अहवालांत, फाटल्यान धक्को दिवन जाल्ल्या अपघातांची सगळ्यांत चड नोंद जाल्या. एक वाहन आनी दुसऱ्या वाहनां मदीं टक्कर जावपाची संख्या 21 टक्क्यां मेरेन आसा. ताचे सकयल मुखार धक्को दिवपाचें प्रमाण 16.9 टक्के आसा.
4. दिसाच्या वेळार चड अपघात
   तीन चतुर्थांश अपघात हे दिसाच्या वेळार जाल्यात. दिसाच्या उजवाडांत जावपी अपघात 74.2 टक्के आनी तातूंत मरण आयिल्ल्यांचो आंकडो 71 टक्के आसा. जाल्यार पावस, धुकें आनी गाराच्या वेळार जाल्ल्या अपघातांचो आंकडो 16.6 टक्के आसा.
5. चडशे अपघात आनी मरणां स्कुटरींक
   2022 वर्सा स्कुटरींचो आस्पाव आशिल्ले वट्ट 63,115 अपघात जाले. ह्या अपघातांत 25,228 जाणांक मरण आयले. चार चाकी वाहनांचे अपघात दुसऱ्या क्रमांकाचेर आसात. 29,005 अपघात ! तातूंत 10,174 जाणांक मरण आयले. जाल्यार चलत वचप्यांचेर गाडी मारपाचे २०,५१३ अपघात जाल्यात आनी तांतूत 10,160 चलप्यांक मरण आयलां.
6. सिक्किमांत मरण येवपाचें प्रमाण चड, लडाखांत उणें
   रस्त्याच्या अपघाताची आंकडेवारी विस्तारान सांगपा खातीर उल्लेख केल्ल्या राज्यांतल्या वाहनांचो आंकडो पळोवन मरण येवपाचें प्रमाण मेजतात. दर धा हजार वाहनां फाटल्यान रस्त्याच्या अपघातांत मरण येवपी लोकांचो आंकडो पळोवन मरण येवपाचें प्रमाण मेजतात. ते प्रमाण सिक्किमांत सगळ्यांत चड मरण येवपाचें प्रमाण दिसून आयलां. तें 17 टक्के आसा. जाल्यार लडाख, दमण आनी दीव ह्या केंद्रशासित प्रदेशांत मरण येवपाचें प्रमाण ‘शून्य’ आसून ते सगळ्यांत उणें आसा. भारतांत सरासरी मरण येवपाचें प्रमाण ५.२, जाल्यार महाराष्ट्रांत मरण येवपाचें प्रमाण देशांतल्या सरासरी परस उणें आसून तें चार इतले आसा.
7. तमिळनाडूंत चड अपघात
   तमिळनाडूंत सगळ्यांत चड वट्ट 64,105 अपघातांची नोंद जाल्या. फाटल्या वर्सा परस अपघातांचो आंकडो 15.1 टक्क्यांनी वाडला. भारतांतल्या वट्ट अपघातांपरस हो आंकडो 13 टक्क्यांनी चड आसा. ते उपरांत मध्य प्रदेश दुसरे सुवातेर आसा. 2022 वर्सा 54,432 अपघातांची नोंद जाल्या. तातूंत महाराष्ट्राचो सवो क्रमांक आसा. थंय 33,383 अपघात नोंद जाल्यात.
8. दिसभरांत 1200 परस चड अपघात
   भारतांत दिसभरांत 1,264 अपघात जातात आनी तांतूत 462 लोकांक मरण येता. भारतांत दर वरांक 53 अपघात जातात आनी तातूंत 19 जाणांक मरण येता.