भांगरभूंय | प्रतिनिधी
नवी दिल्ली, खबरां संस्था: एके वटेन देशांत बेकायदेशीर रितीन स्थायीक जाल्ल्या ४० हजारां परस चड रोहिंग्या मुसलमान घुसखोरांक परतून आपल्या देशांत धाडपाचो यत्न भारत सरकार करता. जाल्यार दुसरे वटेन बांगलादेशाचे शिमे वयल्यान दर म्हयन्याक २०० परस चड रोहिंग्या लोकांक घुसखोरी करून भारतांत धाडटात. उपरांत ह्या रोहिंग्या मुसलमानांक देशांतल्या १४ राज्यांनी म्हळ्यार आसाम, अस्तंत बंगाल, त्रिपुरा, मिझोराम, मेघालय, जम्मू-काश्मीर, हरियाणा, पंजाब, मध्य प्रदेश, उत्तर प्रदेश, राजस्थान, महाराष्ट्र, गुजरात आनी केरळांत बोगस वळखपत्रां दिवन तांची वसणूक करतात. हें सगळें काम आंतरराश्ट्रीय मनीस तस्करी करपी गट करतात.
हालीं एनआयएच्या पंगडान ह्या मनशाचे तस्करी टोळीचो सुत्रधार जलील मियॉं हाका अटक केली. ताच्या गटांतल्या हेर दुबावितां सयत एनआयए जलीलाची चवकशी करता.
आरोपी त्रिपुरा सावन एक गट चलयतालो, १० ते २० लाख रुपया वसूल करतालो. आरोपी जलील हो त्रिपुरा रावपी. एनआयएन ताचेर एक लाख रुपया इनाम दिवपाची घोशणा केल्ली. जलील मियॉं हो अटक केल्ले टोळीचो म्होरक्या जिबोन रुद्र पाल उर्फ सुमनचा साथीदार जावन आसा. ताका हाचे पयलीं एनआयएने अटक केल्ली.
दर दिसा ५ ते १० रोहिंग्या लोक जमनीपोंदा आशिल्ल्या बोगद्यांतल्यान भारतांत घुसतात. हो गट दर दिसा बांगलादेशांतल्यान ५ ते १० लोकांक भारतांत हाडटालो. ते खातीर बांगलादेशाचे शिमेचेर आशिल्ल्या आसाम, मिझोराम, मेघालय आनी त्रिपुरा राज्यांनी जमनी पोंदच्यान बोगदे बांदल्यात.
दिल्लींत जायते रोहिंग्या रावतात
जोड राश्ट्र निर्वासित उच्चायुक्तच्या म्हणण्या प्रमाण दिल्लींत १००० रोहिंग्या रावतात अशी नोंदणी जाल्या. पूण तांचो प्रत्यक्ष आंकडो हाचेपरस चड असो अदमास आसा. भारतांतली दिल्ली ही रोहिंग्यां वसणुकेची मुखेल सुवात. दिल्लींत उण्यांत उणीं पांच अशीं अनौपचारीक शिबिरां आसात, जंय रोहिंग्या लोकांचो आंकडो व्हड आसा. दक्षिण दिल्लीच्या जसोला, यमुना नदीचा किनारा, श्रम विहार, कांचन विहार आनी मदनपूर खादर वांगडा आनीक पांच वाठार आसात जंय रोहिंग्या मुस्लिमान रावतात.
भारतांत कितले रोहिंग्या आसात?
भारतांत २०१२ वर्सा सावन रोहिंग्या मुसलमानांचो आंकडो नेटान वाडला. डिसेंबर २०२१ मेरेन भारतांत १८ हजार रोहिंग्या मुसलमान आसात अशें गृह मंत्रालयान युएनएचआरसीच्या अहवालांत सांगलां. भारतांत सुमार ४० हजार रोहिंग्या बेकायदेशीर रितीन रावतात अशें मोदी सरकारान २०१७ वर्सा राज्यसभेक सांगिल्लें. फकत २ वर्सांत देशांतली रोहिंग्या लोकसंख्या ४ पटींनी वाडल्या अशें सरकारान सांगिल्लें. सरकाराच्या म्हणण्या प्रमाण रोहिंग्या लोक मुखेलपणान जम्मू-काश्मीर, हैदराबाद, दिल्ली-एनसीआर, हरियाणा, उत्तर प्रदेश, राजस्थान आनी मणिपूर हांगा आसात. देशांत बांगलादेशी आनी रोहिंग्या लोकां खातीर निर्वासित शिबिर ना अशें सरकारान स्पश्ट केल्लें.
मजगतीं, एनडीए सरकार त्या त्या राज्य सरकारा सयत बेकायदेशीर रावपी रोहिंग्यांक परतून आपल्या देशांत धाडपाची तयारी करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
