भांगरभूंय | प्रतिनिधी
दत्तक प्रक्रियेंत कितें बदल केला?: सर्वोच्च न्यायालयाचो केंद्र सरकाराक प्रस्न
नवी दिल्ली, खबरांं संस्था: भारतांत दर आठ मिनटांनी एक भुरगें बेपत्ता जाता, ह्या अहवालाचेर सर्वोच्च न्यायालयान चिंता उक्तायली. न्यायालयान केंद्र सरकाराक दत्तक प्रक्रिया सुरळीत करपाचो उलो मारीत बेपत्ता भुरग्यांचीं प्रकरणां हाताळपा खतीर नोडल अधिकार्यांची नियुक्ती करपाची प्रक्रिया बेगोबेग करपाचे निर्देशूय सुप्रीम कोर्टान ह्या वेळार दिले.
मजगतीं, देशांत दर आठ मिनटांनी एक भुरगें बेपत्ता जाल्ल्याचो दावो करपी एका वृत्ताचेर सर्वोच्च न्यायालयान चिंता उक्तावन ताका गंभीर समस्या म्हणलां. न्यायमुर्ती बी. व्ही. नागरत्ना आनी आर. महादेवन हांच्या खंडपीठान म्हणलें, देशांतली दत्तक प्रक्रिया गुंतागुंतीची आशिल्ल्यान केंद्राक संबंदीत यंत्रणां सुरळीत करपाचो उलो मारला.
न्यायमूर्ती नागरत्ना हांणी म्हणलें, हांवें एका दिसाळ्यांत वाचलां, दर आठ मिनटांनी एक भुरगें बेपत्ता जाता. तें खरे आसा काय ना हें म्हाका खबर ना. मात हो एक गंभीर मुद्दो जावन आसा. सुनावणे मजगतीं, केंद्रा कडल्यान हाजीर आशिल्ली अतिरिक्त सॉलिसिटर जनरल ऐश्वर्या भाटी हांणी बेपत्ता भुरग्यांच्या प्रकरणांक हाताळपा खातीर नोडल अधिकारी नियुक्त करपाक स सप्तकांचो वेळ मागला.
सर्वोच्च न्यायालयान स सप्तकांचो काळ दिवपाक न्हयकार दिवन एएसजीक ९ डिसेंबर मेरेन प्रक्रिया पुराय करपाक सांगलें. सर्वोच्च न्यायालयान ह्यान पयलीं केंद्राक गृह मंत्रालया खाला बेपत्ता भुरग्यांचो सोद घेवपा खातीर आनी अशे तरेच्या प्रकरणांची चवकशी करपा खातीर एक समर्पीत ऑनलायन पोर्टल तयार करण्याची मागणी केल्ली. याचिकेंत फाटल्या वर्सा उत्तर प्रदेशांत नोंद केल्ल्या पांच प्रकरणांचो उल्लेख केल्लो, जातूंत अल्पवयीन भुरग्यांचें अपहरण केल्लें. मध्यस्थां वरवीं झारखंड, मध्य प्रदेश आनी राजस्थान अश्या राज्यांनी तस्करी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
