भांगरभूंय | प्रतिनिधी
नवी दिल्ली, खबरां संस्था: देशांतले मेट्रो रेल्वे सेवा वेवस्थेन भारतांतली प्रवासी वेवस्थेक बदलूनच उडयली. आयज देशभरांतलीं ११ राज्यां आनी २३ शारांनी १,००० किलोमीटर परस चड अंतराचेर मॅट्रो रेल्वे सेवेचें जाळें पातळ्ळां. देशभरांतले लाखांनी लोक फास्ट, सुलभ आनी परवडपी दरांतल्या प्रवासा खातीर मॅट्रो रेल्वे सेवेचेर निंबून आसात. इतल्या व्हड विस्तारा सयत भारत हो संवसारांत तिसर्या नंबराचेर सगळ्यांत व्हड मॅट्रो रेल्वे सेवा जाळें आशिल्लो देश जाला. भारतांतल्या नागरिकां खातीर मॅट्रो रेल्वे सेवा हे फकत भोंवपाचें साधन न्हय, तें तांच्या शारांतलें जगपाक आनी प्रवासाक नवो आकार दिवपी माध्यम जावन आसा.
पंतप्रधान नरेंद्र मोदी हांणी ५ जानेवारीक भारतांतली मॅट्रो रेल्वे सेवा जाळ्याचो विस्तार करपाचो आनी ताका आनीक घटमूट तशेंच प्रगत करपाचे दिकेन एक व्हड टप्पो पार केला. प्रधानमंत्र्यांनी दिल्ली-गाझियाबाद – मेरठ नमो भारत कॉरिडॉरच्या १३ किलोमीटर लांब मार्गाचें उक्तावण केलें. हाचे वांगडा पंतप्रधान नरेंद्र मोदी हांणी दिल्लीक १२,२०० कोटी रुपयां परस चड रकमेच्या जायत्या उदरगतीच्या प्रकल्पांचें उक्तावण केलें आनी बुन्यादी फातर बसयलो.
उक्तावण जाल्ल्या गाझियाबाद – मेरठ नमो भारत कॉरिडॉर दिल्ली आनी मेरठ मजगतींचो प्रवास व्हडा प्रमाणांत सुरळीत जातलो. हाचे वांगडा पंतप्रधानांनी दिल्ली मेट्रोच्या चवथ्या टप्प्या खाला २.८ किलोमीटर लांबायेच्या नव्या विस्तारीत मार्गाचेंय उक्तावण केलें. ह्या नव्या मार्गाचो लाव अस्तंत दिल्लींतल्या नागरिकांक जातलो. तशेंच प्रधानमंत्र्यांनी २६.५ किलो मिटर लांबायेच्या रिठाला – कुंडली विभागांतल्या मार्गाच्या कामाचोय बुन्यादी फातर बसयलो. ह्या प्रकल्पाक लागून दिल्ली आनी हरयाणा मजगतची जोडणी आनीक घटमूट जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
