भांगरभूंय | प्रतिनिधी
जायत्या ल्हान ल्हान दुयेंसांक लागून भलायकी धोक्यांत पडटा. गोडेंमूत हो तातूंतलोच एक. जायते जाण ताका गंभीरतायेन घेनात. मागीर ताचे व्हड परिणाम भलायकेचेर दिसून येता. हालींच लॅन्सेटांत उजवाडाक आयिल्ल्या एका अभ्यासा प्रमाण, भारतांतल्या धा लोकां मदल्या 4 जाणांक गोडेंमूत आसा.
हो अभ्यास 2017 ते 2019 ह्या काळांत 45 वर्सां आनी ताचे परस चड पिरायेच्या लोकांचेर केलो. ह्या पिरायेच्या गटांतल्या 20 टक्के लोकांक गोडेंमूत आसा. दादले आनी बायलो दोगांय मदीं प्रमाण सारकेंच आसा. शारांतल्या गोडेंमूत दुयेंतींचो आंकडो गांवगिऱ्या वाठारां परस दुपेटीन आसा. हाचे कारण जिणेपद्दत, खावपाच्यो सवयो आनी शारिरीक हालचालींचो उणाव आसूं येता अशें मानतात.
भारतांत गोडेंमूत ही गंभीर समस्या
भारतांत 20 ते 79 वर्सां पिरायेच्या लोकांमदीं गोडेंमूत दुयेंतींचो आंकडो संवसारांत दुसऱ्या क्रमांकाचेर आसा. 2019 वर्सा भारतांत जाल्ल्या वट्ट मरणां मदीं सुमार 3 टक्के गोडेंमूत दुयेंती आशिल्ले. हाचे वांगडाच उच्च रक्तदाब दुयेंतींचो आंकडोय नेटान वाडत आसा. दोनूय दुयेसांचेर वेळार नियंत्रण दवरूंक ना जाल्यार काळीज, मूत्रपिंड आनी दोळ्यांक गंभीर समस्या निर्माण जावंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
