भारतांत ‘गिरेस्त’ वाडटात
भांगरभूंय | प्रतिनिधी
येणावळ कर रिटर्न डेटाची म्हायती
भांगरभूंय । खबरां संस्था
नवी दिल्ली ः अंदूंच्या आय कर रिटर्न डेटा प्रमाण भारतांत गिरेस्त लोकांचो आंकडो कांय काळा सावन नेटान वाडत आसा, अशें दिसून आयला. हे म्हायती प्रमाण देशांत एक कोटी परस चड कमाई करपी करदात्यांचो आंकडो वाडला.
2022-23 वर्साच्या आयकर रिटर्नस आंकड्यां प्रमाण आयटीआर दाखल करप्यां मदीं 1 कोटी रुपयां परस चड उत्पन्न आशिल्ल्या करदात्यांचो आंकडो 2.69 लाख आसा. हो आंकडो 2018-19 वर्सा 1.80 लाखां परस 49.4 टक्क्यांनी चड आसा. 2021-22 वर्सा 1 कोटी परस चड कमाई करपी लोकांचो आंकडो 1.93 लाख आशिल्लो. फाटल्या 4 वर्सांत 1 कोटी परस चड कमाई करपी लोकांचो आंकडो 50 टक्क्यांनी वाडला.
एक कोटी रुपया वयर आयकर भरपी करदात्यांचो आंकडो 2019-20 वर्साच्या तुळेंत 41.5 टक्क्यांनी वाडला, जाल्यार पांच लाख रुपया वयर कर भरपी करदात्यांचोय आंकडो वाडला. 2018-19 वर्साचे तुळेंत 5 लाख ते 10 लाख रुपयांच्या करा मदीं 1.10 कोटी करदाते आसात. देशांत गिरेस्त लोकांचो तशेंच एक कोटी परस चड कमाई करपी लोकांचो आंकडो वाडत आसा हें ह्या आंकडेवारींतल्यान स्पश्ट जाता.
गिरेस्त लोकांचो आंकडो वाडलो तरी देशांतल्या वट्ट लोकसंख्येच्या तुळेंत कर भरप्यांचो आंकडो अजूनय खूब उणो आसा. सरकार सगले तरेचे यत्न करून चडांत चड लोकांक कर खाला हाडपाचो यत्न करता. ह्या आंकड्यांनी सुदारणा जाली तरी वट्ट लोकसंख्येंतले फकत 6 टक्के लोक अजून कर भरतात.
2022-23 वर्सा आयकर रिटर्न दाखल केल्ल्याची संख्या 7.78 कोटी आशिल्ली. अंदूं 1.98 कोटी रिटर्न दाखल जाल्ल्यान महाराष्ट्र पयल्या क्रमांकाचेर आसा. उत्तर प्रदेश 75.72 लाखांनी दुसरे सुवातेर आसा. ताचे उपरांत गुजरातांत 75.62 लाख आनी राजस्थानांत 50.88 लाख रिटर्न भरला. अस्तंत बंगालांत 47.93 लाख, तमिळनाडूंत 47.91 लाख, कर्नाटकांत 42.82 लाख आनी दिल्लींत 39.99 लाख आयकर भरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
