भांगरभूंय | प्रतिनिधी
नवी दिल्ली, खबरां संस्था ः भारतांत किडनीच्या दुयेंसाचे प्रमाण, खास करून 15 वर्सां आनी ताचे वयर पिरायेच्या लोकां मदीं नेटान वाडटा. 2011-2017 ह्या काळांत मूत्रपिंडाच्या दुयेंसांत 11.2% वाड जाली जाल्यार 2018-2023 ह्या काळांत 16.38% वाड जाल्या.
‘नेफ्रॉलॉजी’ ह्या नामनेच्या नेमाळ्यांत उजवाडाक आयिल्ल्या एका अभ्यासा प्रमाण, गांवगिऱ्या वाठारांनी क्रॉनिक किडनी डिजीज (CKD) चड गंभीर आसा. हांगाचे 15.34% लोक हाका लागून दुयेंत आसात. जाल्यार शारांनी 10.65% लोकांक मूत्रपिंड संबंदीत समस्या आसात. वायट जिणे पद्दत आनी जिणेंतल्यो जायत्यो ल्हान ल्हान वायट संवयी हाका जापसालदार आसात.
‘ह्यो’ संवयी मूत्रपिंडांक लुकसाण करतात…
उदक उणें पियेवप –
जेन्ना आमी फावो तितले उदक पियेनात तेन्ना मूत्रपिंडांक विखारी पदार्थ भायर काडपाक चड कश्ट करचे पडटात. ताका लागून विखारी पदार्थ कुडींत जमपाक लागतात. आनी हाका लागून किडनी स्टोन आनी इन्फेक्शन जावंक शकतात.
चड मीठ खावप –
मीठांत सोडियमाचे चड प्रमाण आसता, जाका लागून कुडींत उदक सांठोवन उरता. हाका लागून रगताचें प्रमाण वाडटा आनी उच्च रगतदाब जाता. उच्च रक्तदाब ल्हव ल्हव मूत्रपिंडांतल्या रगतपेशींक लुकसाण करता.
प्रक्रिया केल्लें अन्न आनी जंक फूड-
फास्ट फूड, पॅकेज्ड स्नॅक्स, पॅकेज्ड ज्यूस आनी सॉस हातूंत सोडियम, प्रिझर्वेटिव्ह्ज आनी रसायनां चड प्रमाणांत आसतात. हाका लागून मूत्रपिंडांचेर चड भार पडटा आनी ल्हव ल्हव मूत्रपिंड इबाडूंक लागता.
वेदनाशामक वखदां घेवप-
वेदनाशामक वखदां चड काळ घेतल्यार मूत्रपिंडांतलीं रगतपेशीं आकुंचन जावंक लागतात आनी मूत्रपिंडांतलें रगत फिल्टर करपी नेफ्रॉन ब्लॉक जाता. जाका लागून मूत्रपिंडांची काम करपाची तांक उणी जाता. रगतपेशीं आकुंचन जाल्ल्यान रगत घुंळप उणे जाता. हाका लागून मूत्रपिंड अपयशी जावपाचोय धोको वाडटा.
गोड पदार्थ खावप-
साकर चड खाल्यार कुडींतली रगतांतली साकर वाडटा. हाका लागून गोडेंमूत जावपाचो धोको वाडटा. मूत्रपिंड अपयशी जावपाचें सगळ्यांत व्हडलें कारण म्हळ्यार गोडेंमूत.
सिगरेट आनी सोरो पियेवप-
सिगरेट आनी सोरो पियेल्यार मूत्रपिंडांतलीं रगतवाहिनी आकुंचन जातात, जाका लागून रगत घुंळप उणे जाता. ताका लागून मूत्रपिंड दुबळे जातात आनी सारकें काम करपाक शकनात.
मुतप कंट्रोल करप-
मुतप बरोच वेळ कंट्रोल केल्ल्यार बॅक्टेरिया मूत्रपिंडांत पावून मूत्रपिंडांत इन्फेक्शन जावंक शकता. तशेंच ताका लागून मुताच्या मार्गांत इन्फेक्शन (UTI) जावंक शकता. ह्या संवयीक लागून किडनी स्टोन आनी क्रॉनिक किडनी डिसीज (CKD) लेगीत जावंक शकता. तशेंच मूत्रपिंडांचें लुकसाण जावंक शकता.
व्यायाम करप ना –
तुमी चड वेळ एकाच स्थितींत बसल्यार तुमकां मोटसाण, उच्च रक्तदाब आनी गोडेंमूत जावपाचो धोको वाडटा, जो मूत्रपिंडाचे दुयेंस आनी लुकसाण जावपाचें मुखेल कारण थारुंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
