भारतांतल्या ‘ह्या’ देवळांत मासिक पाळये वेळार करपाक मेळटा पुजा

भांगरभूंय | प्रतिनिधी

चेन्नय, खबरां संस्था ः मासिक पाळी हो शाप न्हय तर वरदान. पूण आमच्या भारतांत जायत्या सुवातींनी मासिक पाळयेक सामकी अपवित्र मानतात. पूण बदलत्या काळा प्रमाण आधुनीक विचारांचे लोक तिका अपवित्र मानिनात. भारतांतल्या एका देवळान अशीच एक देख दिल्या. कारण हांगा बायलांक मासिक पाळयेच्या वेळार अपवित्र मानिनात. हेर दिसां प्रमाण बायलांक मासिक पाळये वेळारय देवळांत विधीपुजेक येवंक मेळटा.
भारतांत बायलांक खूब निर्बंध आसात. देखीक मासिक पाळयेच्या वेळार बायलांक देवळांत प्रवेश करप शुभ मानिनात. घरांत लेगीत ह्या काळांत बायलां पुजा करिनात. पूण हे कल्पने पसून पयस वचून भारतांतल्या एका देवळांत बायलांक मासिक पाळयेच्या वेळार पुजा करपाक मेळटा.

‘ह्या’ देवळांत करपाक मेळटा पुजा

तमिळनाडूंतल्या कोयंम्बतूरच्या माँ लिंग भैरवी देवळांत बायलांक मासिक पाळये वेळार पुजा करपाक मेळटा. कोयंम्बतूर सावन लिंग भैरवी 30 किमी. अंतराचेर आसा. कोयंम्बतूर रेल्वे स्टेशना वयल्यान सरळ हांगा येवंक मेळटा. सद्गुरू जग्गी वासुदेव आश्रमांत हें देवूळ आसा. हें तमिळनाडूच्या नामनेच्या देवळां मदले एक.

विशेश गजाल म्हळ्यार….

ह्या देवळाची खाशेली गजाल म्हळ्यार देवळाच्या भितरल्या गाभाऱ्यात फकत बायलांक प्रवेश आसा. देखून हें देवूळ बायलां खातीर खाशेलें आसा. ह्या देवळांत पुजारी म्हूण फकत बायलांच आसात. देखून फकत बायलांच हें देवूळ सांबाळटात. ह्या बायल पुजाऱ्यांक देवळांत ‘भैरागिनी माँ’ अशें म्हण्टात. भैरवी देवळांत दर पौर्णिमेक देवीची व्हड मिरवणूक आसता. हे देवूळ बायलां खातीर खाशेले आसले तरी ह्या देवळाक दादल्यांकय भेट दिवपाक मेळटा.