भांगरभूंय | प्रतिनिधी
नवी दिल्ली, खबरां संस्था ः भारतांत बायलांची लोकसंख्या 65 कोटी परस चड आसा. तरी लेगीत फकत 19 टक्के म्हणल्यार 12 कोटी बायलां उंचेल्या पदांचेर काम करतात. टीमलीजच्या अहवाला प्रमाण फकत 46 टक्के एंट्री लेव्हल पदां बायलां कडेन आसात.
बायलां मदीं बेरोजगारीचें प्रमाण 2.9 टक्क्यां वयल्यान 3.2 टक्क्यां मेरेन वाडलां अशेंय अहवालांत म्हणलां. हाचे वयल्यान नोकरी स्थिरताय आनी रोजगार मेळोवपा खातीर बायलांक खूब संघर्श करचो पडटा हें स्पश्ट जाता. हाचें मुखेल कारण म्हणल्यार चलयांक शिक्षणाचो उणाव आनी असमानताय.
साक्षरतेचें प्रमाण उणें
2011 वर्साचे जनगणने प्रमाण भारतांत फकत 65% बायलां साक्षर आसात, जाल्यार दादल्यां मदीं साक्षरतायेचें प्रमाण 80% आसा. भारतांतलें राश्ट्रीय साक्षरतेचें प्रमाण फकत 74% आसा, जें संवसारीक सरासरी परस 83% उणें आसा.
भारतांत कृशी मळार काम करपी 76.9% गांवगिऱ्या वाठारांतली बायलां आसात. जाल्यार दादल्यांचो आंकडो फकत 49.4% आसा.
लैंगिक समानतायेंत सुदारणा जाली तरी कामगार दळांत बायलांचें प्रतिनिधित्व उणें उरलां. 2023 वर्सा मेरेन संवसारीक कामगार दळांत बांयलांचो वांटो घेवपाचें प्रमाण 47% आशिल्लें, जाल्यार दादल्यांचें 72% आशिल्लें. दोगांयच्या प्रमाणांत 25% परस चड फरक आसा.
हे असमानतेचेर चडसो समाजीक नेम आनी लिंगीक अपेक्षांचो परिणाम जाता, जे बायलांक मुखेलपणान काळजी घेवपी आनी दादल्यांक कमवपी म्हणून मानतात. काळजी आनी घरगुती जापसालदारक्यो हांचे असमान वांटप हें बायलांच्या अर्थीक सहभागाची म्हत्वाची आडखळ आसा.
घराची आनी भुरग्यांची जतनाय घेवपाक दादल्यांपरस बायलां दिसाक 2.8 वरां चड वेळ घालयतात. अहवाला प्रमाण 2050 मेरेन बायलां दिसाक 2.3 वरां चड वा दादल्यां परस 9.5% चड वेळ घरगुती कामां खातीर दितली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
