भारतांतली आवडती डीश बिर्याणी

भांगरभूंय | प्रतिनिधी

8 वर्सां सावन बिर्याणी पयल्या क्रमांकाचेर

नवी दिल्ली, खबरां संस्था ः अन्न वितरण सेवा पुरवणदार झोमाटो (Zomato) आनी स्विगी (Swiggy) हांणी ऑर्डर पॅटर्ना विशीं आपलो अहवाल जाहीर केला. तांच्या मतान 2023 वर्सा देशांत सगळ्यांत चड बिर्याणी ऑर्डर जाल्ली आनी अंदूंय भारतांत बिर्याणी सगल्यांत चड ऑर्डर केल्ली डीश थारली. विशेश म्हळ्यार फाटल्या 8 वर्सां सावन बिर्याणी पयल्या क्रमांकाचेर आसा.
झोमाटोच्या म्हणण्या प्रमाण, 2023 वर्सा 10.09 कोटी बिर्याणी ऑर्डर जाल्या. उपरात पिझ्झा 7.45 कोटी ऑर्डर घेवन दुसरे सुवातेर आनी नूडल बाऊलाक 4.55 कोटी ऑर्डर घेवन तिसऱ्या क्रमांकाचेर आसा.

मुंबयच्या हानीस नांवाच्या मनशाक झोमाटोन देशांतल्या ‘सगल्यांत व्हड फूडी’ ही पदवी दिल्या. हानिसने 2023 वर्सा वट्ट 3580 जिनस ऑर्डर केल्ले, सरासरी दिसाक 9 ऑर्डर.

झोमाटोचे ऑर्डर रेकॉर्ड

० 2023 वर्सा सगळ्यांत चड नाश्तो बेंगळुरातल्या लोकांनी ऑर्डर केल्लो.
० दिल्ली वापरप्यांनी रातच्या वेळार चडांत चड ऑर्डरी दिल्यो.
० बेंगळुरूच्या एका मनशान सगळ्यांत व्हडली ऑर्डर 46273 रुपयाची दिली.
० मुंबयच्या एका मनशान एकाच दिसा सगळ्यांत चड 121 ऑर्डरी दिल्यो.
० बेंगळुरूच्या एका मनशान 6.6 लाख रुपयांची 1389 भेटवस्तू ऑर्डर केली.