भायल्यांक गोंयांत स्थायीक जावपाचेर निर्बंध जाय

भांगरभूंय | प्रतिनिधी

विरियातो फर्नांडीस : कोंकणी भाशा मंडळाचो वर्धापनदीस उमेदीन

भांगरभूंय । खबरां मेज

पणजी : गोंयांत कितलेय पर्यटक आयले तरीय अतिथी देवो भव हे म्हणी प्रमाण तांकां येवकार आसाच, पूण गोंया भायल्यान येवन गोंयांत स्थायीक जावपाचेर हाचे फुडें निर्बंध घातलें ना जाल्यार आमची अस्मिताय शेऩून वचपाचो भंय आसा, अशें मत खासदार विरियातो फर्नांडीस हांणी उक्तायलो.

फोंडेंच्या राजीव गांधी कलामंदिरांत आयोजीत केल्ल्या कोंकणी भाशा मंडळाच्या 63 व्या वर्धापन दीस सुवाळ्यांत खासदार फर्नांडीस मुखेल सोयरे म्हूण उलयताले.

1967 चो जनमत कौल आसूं वा घटक राज्याच्या दर्जा खातीरचें आंदोलन आसूं. ह्या दोनूय चळवळीच्या केंद्रस्थानार कोंकणी भाशा आशिल्ल्यानूच आमी हे लडायेंत जैत मेळोवपाक शकले, अशेंय फर्नांडीस हांणी सांगलें. कोंकणी भाशेच्या संवर्धना खातीरचे खंयचेय चळवळींत आपलो सक्रीय वांटो आसतलो, अशें आस्वासन तांणी ह्या वेळार दिलें.

प्रास्ताविकांत कोंकणा भाशा मंडळाची अध्यक्ष रत्नमाला दिवकार हांणी मंडळ करता त्या कामाचो नियाळ घेतलो. कोंकणी माध्यमाची मुळावी शाओळा चलोवपा खातीर शिक्षण खात्या कडल्यान परवानगी घेवन जर कोणूय इंग्लीश माध्यमाचो वापर करता जाल्यार तांचेर कारवाय करपाची मागणी तांणी केली. तशेंच कोंकणी माध्यमांतली एकूय शाळा नाशिल्ल्या म्हालांत सरकारान फुडाकार घेवन शाळा सुरू करच्यो, असोय उलो तांणी मारलो.

गोंयांतल्या क्रिस्तांव समाजाक नागरी लिपी कळपाक आडमेळी येतात, असो अपप्रचार करप्यांक अंदूं यत्ता 10 वी, 12 वी आनी विद्यापीठ पांवड्यार कोंकणी विशयांत पयलो नंबर घेवपी क्रिस्तांव समाजांतल्या सवूय विद्यार्थ्यां कडल्यान सणसणीत थापट पडलां, अशें दिवकार हांणी सांगलें.

हे कार्यावळीक मंडळाचे उपाध्यक्ष रुपेश ठाणेकार, सरचिटणीस मंगलदास भट आनी भांडारी डॉ. पुरूषोत्तम वेर्लेकार हांचे भायर उद्देजक संदीप निगळ्ये, जॉन आगीयार, प्रकाश नायक, भारती जाधव, फिलोमेना सांफ्रांसीस्को आनी उदय म्हांब्रे खास निमंत्रीत म्हूण उपस्थीत आशिल्ले.

ह्या वेळार मानेस्तां हस्तुकीं साहित्य, पत्रकारिता, शिक्षण आनी हेर मळां वयल्या पर्जळीत कामगिरी खातीर उल्हास पै भाटीकार, शिवनाथ नागेशकार, फ्रांसीस फर्नांडीस, प्रसाद पांगम, एच. मनोज, प्रकाश पर्येकार, डॅनीयल डिसोजा, सखाराम बोरकार, उदय देशप्रभू, शैलेंद्र मेहता, आरमांद फर्नांडीस, चेतन आचार्य, ग्लिनीस डायस, व्हॅनीसा आल्मेदा ह्या पुरस्कार जैतवंतांचो भोवमान केलो. तशेंच यत्ता 10 वी, 12 वी आनी विद्यापीठ पांवड्याचेर पुराय गोंयांतल्यान कोंकणी विशयांत पयलो नंबर घेवन पास जाल्ल्या विद्यार्थ्यांचो भोवमान केलो.

मंडळा वतीन उजवाडाक हाडिल्ले यादस्तिकेचें खासदाराचे हस्तुकीं लोकार्पण केलें.  सर्वोदय विद्यालय कुडचडें, विद्याभुवन कोंकणी शाळा आनी रवींद्र केळेकार ज्ञानमंदीर मडगांव तशेंच गुरूकुल अकादमी फोंडेंच्य विद्यार्थ्यांनी सांस्कृतीक कार्यावळ सादर केली. रुपेश ठाणेकार हांणी येवकार दिलो, मंगलदास भट हांणी उपकार मानले. शलाका लवंदे आनी दत्तरारज नायक हांणी सुत्रसंचालन केलें.