भांगरभूंय | प्रतिनिधी
खाणां- जेवणा वयल्यान कोणाचेर सक्ती करप योग्य न्हय. ते बाबतींत आमच्या गोंयांत अजून तरी कोणाचेर खावपा- पिवपाचेर कसलेंच बंधन ना. पूण, कांय खाणां भलायकेक बरीं आसतलींच, थंय नितळसाण आसतलीच (हायजेनीक) हाची खात्री दिवं नज. खास करून भायर रस्त्या कुशीक मेळटात तीं. तरीय आमी सांजवेळा थंय घिट्टी घालतात. कांय गोंयकार तर खास तीं खाणां खावपाक देड- दोन किलोमिटर गाडी घेवन वतात. बऱ्याच लोकांक ह्या खाणांचें व्यसनूय लागलां. देखून फाटल्या कांय वर्सांनी प्रत्येक शारांत, रस्त्याचे कुशीक हे खाणां विकपी गाडे वाडल्यात. म्हापश्यां वाठारांत ह्या गाड्यां वयल्यान सध्या वाद सुरू जाला. अर्थांत भलायकेच्या मुद्द्यां वयल्यान न्हय, तर नगरसेवकांक विस्वासांत घेवंक नात म्हूण! पणजे फाटोफाट आतां म्हापशें स्मार्ट सिटी जावपाची आसा. ताची तयारी पालिकेन आतां पसूनच तयार केल्या. अतिक्रमण हटाव मोहिमे खाला शारांतले भेळपुरी आनी हेर खाणां विकपी गाडे काडिल्ले. स्मार्ट सिटीच्या नेमा खाला ते शारांत घालपाक मेळचें नात, अशें सांगून ह्या गाड्यांक म्हापशें पालिका वाठारांतल्या भितरल्या भागांनी जागे दिल्यात. मात हें करतना पालिका प्रशासनान आमच्या एकाय नगरसेवकाक विस्वासांत घेवंक ना, असो पालिका मंडळाचो दावो. ताका लागून आतां प्रशासन आनी पालिका मंडळ हांचे मदीं पेटपाचीं चिन्ना दिसतात. तशें पळोवंक गेल्यार मंडळाक विचारून त्या गाड्यांचें हेर कडेन स्थलांतर करपाक जाय आशिल्लें. निदान तांचे कडेन ह्या विशयाचेर भासाभास करपाक जाय आसली. कारण तांकां लोकांनी वेंचून दिल्यात. लोकप्रतिनिधींक विचारिनासतना तांच्या प्रभागांत गाडो सुरू करप योग्य न्हय. थळाव्या लोकांचोय गाड्यांक विरोध जावं येता.
आमच्या गोंयांत सगल्या शारांनी भेळपुरी, चिकन शोर्मा, रस्ता आम्लेट, मिरची- भज्यांचे गाडे आसात. भोवतेक परप्रांतीय चलयतात. रातपाळयेक कामाक आशिल्ल्या लोकां खातीर ते फायद्याचे थारतात. मात, भलायकी खातें, अन्न आनी वखदां प्रशासनाचें तांचेर लक्ष आसपाकूक जाय. तेंय सद्दां. चवथ, दिवाळी, नातलांच्या चार दीस पयलीं धाडी घालप आनी मागीर हात कवळून ओगी बसप चुकीचें. ह्यो धाडी दर पंद्रशेक घालपाक जाय. तशेंच खावपाचे जिनस विकतात त्या गाळ्यांचेर, गाड्यांचेर नितळसाण आसता काय ना. च्याचे ग्लास, बश्यो धुंवपाक कसलें उदक वापरतात, विकप्यांची भलायकी…. हाची पळोवणी जावंक जाय. खावप्यांनीय शिटूक आसपाक जाय. फाटीं पणजे बालभवना कडेन रस्त्याचें काम चलतना धुल्ल जातालो. ते स्थितींत थंय भेळपुरीचो एक गाडो सांजवेळार येवन रावतालो आनी मजा म्हणल्यार लोक थंय येवन रुचीन भेळपुरी, खरें म्हणल्यार ‘धुळ’पुरी खाताले. हांगां त्या गाडेकाराची चूक म्हणपाची काय खावप्याची? कांय म्हयन्यां पयलीं म्हापश्यां शारा भायर चिकन शोर्मा खावन कांय जाण दुयेंत पडिल्ले. मनशान जिबेचेर नियंत्रण दवरपाक जाय म्हणटात, ते ओगीच न्हय. मात तें नासता. तेलकट, मसाल्याचीं खाणां खावपांत आमी भारतीय संवसारांत नंबर वन आसतले!!
सवाय खाणा भशेन भायले खाणूय पोटफुगें. हें असलें तेलकट, मसाल्याचें जिनस विकचे परस ह्या ल्हान विक्रेत्यांक पुश्टीक खाणां विकप शक्य ना? हाॅस्पिटलां कुशीक आशिल्ल्या गाडेकारांनी हाचेर विचार करूंक फावो. फोव, उपीट, इडली, नासण्याचें सत्व, तांदळाची भाकरी, पेज असले जिन्नस बटाटवडे, रस्सा आॅम्लेट, मिरची, गोबी मंच्युरियना परस खूब बरे आनी पुश्टीक. कांय जाण ते विकतातूय आसतले, पूण खंयूय गेल्यार चड खपतात, तीं तेलकट, मसाल्याचीं खाणां. खावपी स्वता सुदरनात, तो मेरेन हें कोण बदलूंक शकना. कांय वर्सां पयलीं सोऱ्याच्या बार्रा बदला दुदाचे गाडे सुरू करपाची एक बरी कल्पना मुखार आयिल्ली. पूण ती चालीक लागली ना. चार पेग मारले काय बोकड्याचो शिंव जाता, तो दोन लीटर दूद पियेलो म्हूण जातलो?? गोंयकारांची भलायकी इबाडपाक हे नितळसाण पाळिनाशिल्ले कांय विक्रेते जापसालदार आसात, अशें म्हणल्यार कोणाक वायट दिसूं नये. अन्न आनी वखदां प्रशासन खात्यान सक्रीय जाल्यार भलायकेचे कांय प्रस्न तरी सुट्टले. पंचायत, पालिकांनीय हाचेर विचार करूंक फावो. मेळटा थंय बार्रां, पोटफुगीं खाणां…. गोंयकारांक हें एक दीस घातमारें थारिना जाल्यार पुरो!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
