भांगरभूंय | प्रतिनिधी
पणजी: गाेंयच्यो 56 टक्के आंगणवाडी ह्यो भाड्याचे सुवातेंत चलतात. ह्या सुवातांचें भाडें दिवपा खातीर सरकार दर म्हयन्याक सुमार 40 लाख रुपया खर्च करता, अशी म्हायती बायलां आनी भुरगीं उदरगत खात्यान दिली.
खात्यान जारी केल्ले अधिकृत आंकडेवारी प्रमाण गोंयांतल्या वट्ट 1262 आंगणवाडी मदल्यो 511 आंगणवाडी केंद्रां सरकारी इमारतींनी आसात, जाल्यार 700 केंद्रां भाड्याच्या सुवातांनी सुरू आसात. खाजगी सुवातांचेर आशिल्ल्या आंगणवाडी खातीर गोंय सरकाराक दर म्हयन्याक रु. 3,98,000 इतलो भाड्याचो खर्च करचो पडटा.
ह्या आंकडेवारींतल्यान ग्रामीण आनी शारी वाठारांतल्या भाड्याच्या दरांतली तफावत स्पश्ट जाता. ग्रामीण भागांतलीं चडशीं केंद्रां सरकारान रु. 2 हजार दर म्हयन्याक ह्या दरान भाड्यान घेतल्यांत. हाचे उरफाटें, पणजी, म्हापशें, फातोड्डें आनी वास्को सारक्या मुखेल शारांनी आशिल्ल्या केंद्रां खातीर रु. 6000 इतलें भाडें सरकार भरता.
भाड्याच्या सुवातांचो आंकडो चड आसलो तरी, सरकारान कितल्याशाच केंद्रां खातीर खर्च उणो करपा खातीर यश मेळयलां. 1,225 परस चड आंगणवडी शुन्य भाड्याचेर सुरू आसात. हीं केंद्रां सद्याच्या सरकारी सोयी-सुविधांनी सुरू केल्यांत. हातूंत सरकारी मुळावी शाळा, पंचायत इमारती, कम्युनिटी हॉल्स आनी हेर सरकारी संस्थांच्या इमारती जशे की ग्रामीण विकास संस्था आनी समग्र शिक्षा अभियान हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
