भांगरभूंय | प्रतिनिधी
गोंयकारांक न्हय, गोंयां भायल्या चलोवपाक दिल्ल्या शॅकांचेर कारवाय करचीः शॅक धनी
पणजीः दुसर्यांक चलोवपाक दिल्ल्या शॅकांचेर कारवाय करपाची मोहीम पर्यटन खात्यान हातांत घेतिल्ल्यान शॅक धनयां मदीं कोफुसांव पेटलां. आमी शॅकां गोंयां भायल्याक चलोवपाक दिवपाच्या प्रकारांक खर विरोध करतात. मात हीं शॅकां धनयांनी गोंयकारांक चलोवपाक दिवपांक सरकारान मेकळीक दिवची, अशी मागणी अखील गोंय शॅक संघटणेन केल्या. जाल्यार शॅकां भायल्यांक चलोवपाक दिव वा गोंयकारांक चलोवपाक दिव, शॅक धोरणाचे नेम हे पाळिनात, अशें पर्यटक संचालक केदार नायक हांणी म्हणलें.
पर्यटन खात्यान वाटून दिल्लीं शॅकां परस्पर दुसर्यांक चलोवपाक दिल्ल्याचें नदरेक येतकत तांचेर कारवाय करपाची मोहीम हातांत घेवन ११० शॅकांक नोटीस काडिल्ली. तातुंतलीं २३ शॅकां हीं दुसर्यांक चलोवपाक दिल्यांत हें कळ्ळे उपरांत तीं बंद करून मोडपाचो आदेश पर्यटन खात्यान काडलो.हाचे मदलीं ६ शॅकां गोंयां भायल्यांक चलोवपाक दिल्यांत.
हे कारवायेचेर जाप दितना अखील गोंय शॅक संघटनेचे अध्यक्ष क्रुझ कार्दोज हांणी सांगलें, जी कारवाय करपाची मोहीम पर्यटन खात्यान हातांत घेतल्या तिका आमी येवकार दितात. पूण पर्यटन खात्यान जीं शॅकां गोंयां भायल्यांक चलोवपाक दिल्यांत तांचेरूच कारवाय करची आनी गोंयकारांक चलोवपाक दिल्यांत तीं साल्वार करचीं.
जीं २३ शॅकां मोडपाचो आदेश काडला तातूंत गोंयकारान गोंयकारांक चलोवपाक दिल्ल्या शॅकांचो आसपाव आसा. सरकाराचें धोरण आसा तो म्हळ्यार शॅक वेवसाय हो गोंयकारांकडेच उरचो आनी हे धोरणा प्रमाण हीं शॅकां आमी गोंयकारांकूच चलोवपाक दिवन तो वेवसाय गोंयकारांकडेन दवरतात, असो युक्तीवाद कार्दोज हांणी केलो.
लोटरी उपक्रमा वरवीं शॅकाचें वाटप जाता. देखून जे परंपरीक शॅक वेवसायीक आसात ते भायर पडल्यात. हेच परंपरीक वेवसायीक आसात तेच हीं शॅकां भाड्यार घेवन चलयतात. तशेंच ६५ वर्साचेे शॅक धनी लोटरी उपक्रमांक लागून तांकां संद मेळूंक ना. हे पिरायेेेचेर तो खंय काम सोदतलो देखून मनीसपणाच्या नात्यान आमी हीं शॅकां तांकां चलोवपाक दिवची म्हण मागणी आमी पर्यटन खात्याकडेन करतले, अशें कार्दोज हांणी सांगलें.
हे विशीं उलयतना पर्यटन खात्याचे संचालक केदार नायक हांणी सांगलें, जी आपलीं शॅकां धनयांनी गोंयकार आनी भायल्यांक दिल्यांत सद्या त्या दोगांचेरय कारवाय केल्या.
जेन्ना आपलें शॅक एक दर थारोवन दुसर्यांक चलोवपांक दिता ते गोंय शॅक धोरण कायद्याचो भंग जाता देखून ताचेर कारवाय आमी चालू दवरल्या. आतां फुडाराक येवपी धोरणांत गोंयकारान गोंयकारांक शॅक चलोवपाक दिवपाचो विशय जाग्यार घालतले. जर सरकार निर्णय घेत जाल्यार फुडाराक नव्या धोरणांत हो विशय सुटावो जातलो, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
