भांगरभूंय | प्रतिनिधी
पणजीः भाटल्यांतले फर्नांडिस बेकरी लागसारच्या एका घरांतलो फोन आनी पयशे चोरपी आरोपीक पणजी पुलिसांनी 24 वरां भितर अटक केली. ताचे कडल्यान चोरी केल्लो सगळो म्हालूय जप्त केलां.
तोप बहादूर के.सी. (मुळ नेपाळ) हांणे 6 जूनाक कागाळ दाखल केल्ली. ते प्रमाण, 4 जूनाक रातीं 11 ते 5 जून सकाळीं 5.30 वरां मजगतीं ताच्या कुडींतल्यान 10 हजारांचो मोबायल आनी 9 हजार मेळून 19 हजरांचो म्हाल चोरलो.
पणजी पुलिसांनी सीसीटीव्ही फुटेजाचेर आदारून चंद्रकांत कृष्णा केनावडेकार (65, चिंबल) हाका अटक करून ताचे कडल्यान चोरिल्लो मोबायल फोन आनी रोख रक्कम जप्त केली. केनावडेकार हो सराईत गुन्यांवकार आसून ताचेर पोरणें गोंय पुलीस स्टेशनांत गुन्यांव नोंद आसात.
उत्तर गोंयचे पुलीस अधीक्षक राहुल गुप्ता आनी पणजेचे उपअधीक्षक सुदेश नायक, पुलीस निरिक्षक विजयकुमार चोडणकार हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
