भाटकारांच्या जमनींतलीं घरा जमनी सयत जातली मुंडकारांच्या नांवार

भांगरभूंय | प्रतिनिधी

-मुख्यमंत्र्यांची हमीः खटले तीन म्हयन्यांत काडटले निकालांत

पणजीः भाटकारांच्या जमनींत आशिल्ल्या 300 चौ. मि. मेरेनच्या घरां सयत जमीन मुंडकार कायद्या प्रमाण मुंडकारांच्या नांवार करपाची प्रक्रिया राज्य सरकारान सुरू केल्या. ते खातीर मामलेदारांची न्यायालयां शेनवाराय सुरू उरतलीं. हे विशींचे प्रलंबीत सगले खटले फुडल्या तीन म्हयन्यांत निकालांत काडटले, अशी हमी मुख्यमंत्री डॉ. प्रमोद सावंत हांणी शेनवारा दिली.

‘आत्मनिर्भर भारत- स्वयंपूर्ण गोंय’ मोहिमेचे फाटभुंयेर स्वयंपूर्ण मित्र, सरपंच, पंच, नगरसेवक आनी नागरिकां कडेन व्हर्च्युअल संवाद कार्यावळींत ते उलयताले. गोंय मुक्त जावन 60 वर्सां जाली. तरी मुंडकारांच्या नांवार अजुनूय घर आनी जमीन जावंक ना, ही व्हड दुख्खाची गजाल आसा.

सध्याचे स्थितींत मुंडकार कायद्या खाला उत्तर गोंयांत दोन हजार आनी दक्षीण गोंयांत 1,500 अर्ज प्रलंबीत आसात. हे अर्ज बेगोबेग निकालांत काडपाचे निर्देश आपूण मामलेदारांक दिल्यात. ते खातीर शेनावाराय तांची न्यायालयां सुरु उरतली.

सुरवातीच्या टप्प्यांत मुंडकार प्रकरणां निकालांत काडटले. उपरांत कूळ आनी देवस्थान जमनीतलीं प्रकरणां निकालांत काडपाची प्रक्रिया सुरू करतले, अशें मुख्यमंत्री डॉ. सावंत हांणी सांगलें.

राज्य सरकारच्या ‘आत्मनिर्भर भारत – स्वयंपूर्ण गोंय’ मोहिमेची दखल देशांतल्या विवीध राज्यांनी घेतल्या. हे मोहिमे खाला राज्याची सर्वांगी उदरगत करपाचो यत्न आसा. प्रधानमंत्री नरेंद्र मोदी हांच्या सपनांतलो 2047 चो विकसीत भारत सत्यांत हाडपाक ही मोहीम निश्चीत म्हत्वाची थारतली, असो विस्वास तांणी उक्तायलो.

मजगतीं, हे कार्यावळींत विवीध पंचायतींच्या सरपंचांनी विचारिल्ल्या प्रस्नांक मुख्यमंत्र्यांनी जाप दिली. पंचायतीच्या निधी वितरणांत कळात जाता. ताचे परिणाम उदरगतीच्या कामांचेर जायत आशिल्ल्याचे एका सरपंचान सांगलें. ताचेर पंचायतींक मेळांत निधी मेळचो हे खातीरची येवजण अर्थसंकल्पांत जाहीर करतले, अशें मुख्यमंत्र्यांनी सांगलें.

‘अॅप्रेंटिसशीप’चाे लाव घेऊन कुशळ जायात

राज्यांतल्या तरणाट्यांक सरकारी तशेंच खाजगी क्षेत्रांत चडांत चड नोकऱ्यो उपलब्ध करून दिवपाक सरकारान मुख्यमंत्री अॅप्रेंटिसशीप येवजण सुरू केल्या. आतां मेरेन हजारांनी युवक-युवकांनी ह्या येवजणेचो लाव घेतला आसून, तांकां प्रशिक्षण दितात. हाचे मुखार सरकारी नोकरे खातीर अॅपेंटिसशीप प्रमाणपत्र सक्तीचें करतले. ताका लागून युवक-युवतींनी हे येवजणेचो लाव घेवचो आनी आपआपल्या क्षेत्रांत कुशळ जावचे, असो उलो मुख्यमंत्री डॉ. प्रमोद सावंत हांणी केला.

विश्वकर्मा येवजणः पालिकांनी वेपारी परवाने दिवचे

पणजी : केंद्र सरकारच्या विश्वकर्मा येवजणे खाला प्रशिक्षण घेवन आपरोजगार करपाक इत्सूक गोंयकार कारागिरांनी तांच्या घरच्या नाम्याचेर ‘वेपारी परवाने दिवचे’. वेपारी परवाने दितना तांचे मुखार कसलीच आडमेळी हाडूं नाकात, अशें निर्देश मुख्यमंत्री डाॅ. सावंत हांणी राज्यांतल्या सगल्याच पालिकांक दिल्यात. पात्र कारागिरांक पयलीं प्रशिक्षण, उपरांत 15 हजारांचें टूलकीट मुफत दितले. तशेंच वेवसाया खातीर सुरवातीक एक लाख आनी उपरांत तीन लाखांचें रीण राष्ट्रीय बँकां वरवीं दितले. ताका लागून कारागिरांक स्वताचो वेवसाय करपाक संद मेळटली. गोंयांत आतां मेरेन 20 हजार कारागिरांनी पोर्टलाचेर नोंदणी केल्या, अशी म्हायती नियोजन, सांख्यिकी आ​नी मूल्यमापन खात्याचे संचालक विजय बी. सक्सेना हांणी शुक्रवारी​ पत्रकारां कडेन उलयतना दिली.