भाटकारशाय परतून येतली ?

भांगरभूंय | प्रतिनिधी

भोवतेक धंदे, वेवसाय हातांतल्यान गेल्यात. फुडाराच्या पोटांत कितें तरी भिरांकूळ आसा.

विजयनगराचो अॅडमिरल तिमप्पा वा तिमोजीन पुर्तुगेज सरदार आल्बुकेर्कीच्या सैन्याक आदिलशहा आड लढपाक मजत केली आनी पुर्तुगेजांचो गोंयांत प्रवेश जालो. कांय जाणांच्या मतान तिमप्पानूच पुर्तुगेजांक आपयिल्ले. हो तिमोजी गोंयकार. ताका दिशिल्लें पुर्तुगेज जिखिल्लो वाठार आपल्याक दितले. पूण तशें जालें ना. उपरांत अडेचशीं वर्सांनी पुराय गोंयूच पुर्तुगेजांनी बळकायलें. तांचे मानाय म्हूण काम करपी काळे लोक गोंयकारांक त्रास दिताले. पयले मुख्यमंत्री भाऊसायब बांदोडकार हांणी तांकां बुद्द शिकयिल्ल्याची नोंद मेळटा.
आदल्या तेंपार भाटकाराच्या घरांत, भाटांत, शेतांत गरीब भौस कश्ट करतालो. सांगता तें आयकतालो. ह्या गरिबांक शिक्षण, सत्ता मेळची ना, हाची जतनाय हे भाटकार घेताले. अर्थांत सगलेच भाटकार तशे नाशिल्ले. गोंयचे सर्वांगी उदरगती खातीर तांणी तेन्ना आनी उपरांतच्या काळांत पसून व्हडलें योगदान दिलां.
हें सांगपाचें कारण म्हणल्यार आतां परतून भायली (म्हणल्यार हेर राज्यांतल्या पयशेकारांची) राजवट आमचेर येता काय, आमी सगले मानाय, कामेरीं जातात काय, त्या काळ्या मनशां प्रमाण आमचे कडेन कोण दादागिरी करतलो काय, अशें दिसपाक लागलां. भारतीय स्वातंत्र्याचें शंबरावें वर्स लागचे पयलीं, म्हणल्यार 2047 मेरेन आमकां हें जाग्यार घालचें पडटलें. नाजाल्यार फुडाराच्यो पिळग्यो आमकां माफ करच्यो नात. घडये स्वताकूच गाळीं संवत त्यो गोंय सोडून विदेशांत, देशांत हेर कडेन वचपाक शकतात. हें जावंक जायना म्हूण दरेकल्यान जमता ते प्रमाण कृती करपाचो आयज वेळ आयला.
गोरे पाखले परवडले, म्हूण काळे न्हय, गोरे गेले आतां काळे आमचेर सत्ता गाजयतले, अशें एक वाक्य कोणे तरी बरयलां. पुर्तुगेज राज्य करून गेले, मागीर गोंयकारांनी केलें, मात फुडाराक भायले येवन हांगा राज्य करतले अशें दिसपाक लागलां. आमीच तांकां हांगा हाडल्यात, वसयल्यात. भाटकारांच्या जाग्यार आतां आमकां भायल्यांच्या हाता खाला घाम गळोवचो पडुये. भायले काळे मनीस आमकां बडयताले… आयज आमचेच भारतीय बडयतात. इतिहासाची पुनरावृत्ती जाता, म्हणटात तें खरें. मोरजेच्या बिडियो कार्यालयांत घुसून दिल्लीच्या बापूय, पुतान सचिवाक बडयलो, फ्रॅक्चर केलो, कार्यालयाचीय मोडतोड केली, असो आरोप आसा. तांकां जामिनाचेर सोडल्यात. पोरूं हडफड्यां उत्तर भारतीय बायलेन बावन्सर हाडून एका गोंयकार कुटुंबाक जबरदस्तीन घर खाली करपाक लायिल्लें. त्या प्रकरणाचें मुखार कितें जालें काय? काय पुलीस मुखेल्याचे बदले उपरांत तें शांत जालें? दर्यावेळेर वाटे वयलीं कदेलां कुशीक काडली म्हूण भायल्या कामगारांनी गोंयकार तरणाट्याक जिवेंशीच मारिल्लो. एका ज्येश्ठ नागरिकाक बावन्सरांनी मारपेट केल्लो. भायल्यांची दादागिरी वाडत आसा. परंपरीक वाटो बंद केल्यात. कारण ती मालमत्ता तांणी विकत घेतल्या. कोमुनिदादींची 1990 त कितली जमीन आशिल्ली, 2010 त कितली उरिल्ली आनी 2025 त कितली आसा, हाची आंकडेवारी जाहीर केल्यार घटमूट गोंयकार पसून घुंवळ येवन पडटलो. आमी आपजीण बरयनात. राजकी, समाजीक मळा वयल्या म्हालगड्यान प्रांजळपणान ती बरोवन आपणें कितें पळयलें, आयकलें ताची वळेरी वाचकां मुखार दवरपाक जाय. कोमुनिदादीच्या एखाद्या जाळवणदारान हाचो श्रीगणेशा करचो.
वास्को वाठारांत खंय गोंयकारांक मसुंडेंत वचपाक पास घेवचे पडटात. हें खरें जाल्यार नवे भाटकार गोंयांत तयार जाल्यात. सगल्यो जमनी, दोंगर भायल्यांचे भकीक पडले काय मागीर मानाय, कामेरीं, वावराडे, वावराडी जावपाचो वेळ आमचेर येवचो ना मूं? आतांच भोवतेक धंदे, वेवसाय हातांतल्यान गेल्यात. फुडाराच्या पोटांत कितें तरी भिरांकूळ आसा!!! भायले धनी, पयशेकार गोंयकारांक भियेनासतना शाणेपणां सांगताले. आतां बडयतात.. हाचे मुखार गोंयची समाजीक जीण, संस्कृताय फक्त लोकवेद, लोकनाच, मांडो- कातरां पुरती उरना जाल्यार पुरो! आमेन!!