भांगरभूंय | प्रतिनिधी
सोपो वाडयिल्ल्याचो आरोप
म्हापशें ः हांगाच्या भाजी बाजारांतल्या कंत्राटदारान सोपो कर 50 रुपया वयल्यान 90 रुपया मेरेन वाडयले उपरांत विक्रेत्यांनी मंगळारा सरळ पालिकेचेर ‘आक्रमण’ केलें. ही कर वाड रोखडीच 60 रुपया मेरेन उणी करची अशी मागणी तांणी नगराध्यक्ष आनी उपाध्यक्षा मुखार केल्या. ही गजाल पालिका मंडळा मुखार मांडून ताचेर उपाय काडटले अशे आश्वासन उपनगराध्यक्ष विराज फडके हांणी दिले. ह्या वेळार नगराध्यक्ष प्रिया मिशाळ हाजीर आशिल्ली.
म्हापशें नगरपालिकेन सोपो करांत व्हड प्रमाणांत वाड केल्ल्यान विक्रेते अस्वस्थ जाल्यात. ताणें आपलें मत नगराध्यक्ष आनी उपनगराध्यक्षा मुखार मांडलें. हाचे पयलीं सोपो कर दर चौखण मिटराक 20 रुपया घेताले. हाका लागून विक्रेत्यांक चडांत चड 50 रुपया कर भरचो पडटालो. पूण आतां दर वाडिल्ल्यान ताका 90 रुपया फारीक करचे पडटले. विक्रेत्यांक इतलो कर भरपाक शक्य ना. कारण, सध्या हो वेवसाय उणो चलता. गिरायक बाजारांत येना. देखून हो कर 10 रुपया वाडोवन 60 रुपया करचे अशी मागणी विक्रेत्यांनी केल्या.
उपनगराध्यक्षान उक्तायलें अजाप
उपनगराध्यक्ष फडके हांणी विक्रेत्यांची मागणी पळोवन अजाप उक्तायलें. आमी सोपो चड वाडोवंक ना. नेमा प्रमाण दर चौखण मिटराक 5 रुपया आनी कोयर कर 5 रुपया केला. पूण विक्रेत्यांक ते अपात्र दिसल्यार तांणी ते प्रमाण अर्ज करचो. तो अर्ज पालिका मंडळा मुखार दवरतले. थंय जें थारायतात ते प्रमाण कार्यवाही करतले अशें फडके हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
