भांगरभूंय | प्रतिनिधी
मडगांव: केंद्र सरकार शेतकारांच्या उदरगती खातीर काम करतना आनी नव्यो येवजण्यो हाडटा. शेतांतली अर्थीक येणावळ वाडली जाल्यार नवी पिळगी शेतवडी कडेन वळटली. तरणाटे आनी बायलांक शेतवडींत हाडपाचे यत्न सुरू आसात अशें मंत्री दिगंबर कामत हांणी सांगलें. तशेंच मडगांवांत पोरणे बस स्टँण्डाची उदरगत करतले आनी तळमजल्यार भाजी विकप्यां खातीर शेल्टर बांदतले अशें आश्वासन कामत हांणी दिले.
मडगांवच्या कृशी विज्ञान केंद्रांत प्रधानमंत्री धन-धान्य कृशी येवजण (पीएमडीडीकेवाय) सुरू जाली. ह्या वेळार व्हिडियो कॉन्फरसिंग वरवीं प्रधानमंत्री नरेंद्र मोदी हांची मुखेल कार्यावळ दाखयली. ह्या कार्यावळींत बांदकाम मंत्री दिगंबर कामत, कृशी संचालक संदीप फळदेसाय, प्रकल्प संचालक शिवराम गांवकार, उपजिल्होधिकारी महसूल शर्मिला गांवकार हाजीर आशिल्ले.
शेतकारांक बाजारपेठ दिवपाचो यत्न करतले. मानकुराद आनी हेर जातींच्या आंब्याचें उत्पादन जावन तांचें मार्केटींग जावपाक जाय. शेतकारांक चडांत चड फायदो मेळपाची गरज आसा. फायदो मेळ्ळो जाल्यार तरणाटे भितर येतले. शेतवडींतल्यान चड उत्पादन मेळचे हे खआतीर यत्न करचे पडटले. गांवगिऱ्या वाठारांतल्या शेतकारांक आदार मेळ्ळो जाल्यार शेती तिगून उरतली. नाल्लाचें उत्पादन वाडोवप आनी आंब्याचें मार्केटिंग करपाचेर लक्ष दिवपाची विनंती कृशी मंत्र्या कडेन केल्या अशेंय मंत्री कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
