भाजयो जाल्यो सवाय, नाल्ल मात म्हारगूच

भांगरभूंय | प्रतिनिधी

पणजीः आवक वाडिल्ल्यान फाटल्या सप्तकाचे तुळेंत सोमारा पणजी बाजारांत भाजये सवाय जाल्ल्यो. टमाटां 20 रुपयांनी सवाय जावन 20 रुपया कील जाल्लीं. बटाट 10 रुपयांनी सवाय जावन 30 रुपया कील जाल्ले. अशें आसलें तरी नाल्ल मात अजून म्हारगूच आसात. बाजारांत ल्हान आकाराचो नाल्ल 25 रुपया, मध्यम आकाराचो नाल्ल 40 रुपया जाल्यार व्हड नाल्ल 50 रुपयांक एक असो विकताले. फुडल्या कांय दिसांनी भाजयो आनीक सवाय जावपाची शक्यताय वेपाऱ्यांनी उक्तायल्या.

पणजी बाजारांत तवशी 20 रुपयांनी सवाय जावन 40 रुपया कील जाल्लीं. मटर 20 रुपयांनी सवाय जावन 80 रुपया कील जाल्ले. कोबीच्या एका गड्ड्याचें मोल 5 रुपयांनी सवाय जावन 25 रुपया जाल्लें. फ्लॉवर 5 रुपयांनी सवाय जावन 35 रुपया कील विकताले. जाल्यार दुदी 10 रुपयांनी सवाय जावन 30 रुपया जाल्लो. मिरसांग, भेंडो, दोडकी, चिटकी, कारलीं हांचें दर दरेकी 20 रुपयांनी सवाय जावन 60 रुपया कील जाल्ले.

बाजारांत कांदो 50 रुपया कील ह्या दरान विकताले. ल्हान वायंगीं 60 जाल्यार व्हड वायंगीं 80 रुपया कील आशिल्लीं. वालपापडी 120 रुपया कील आशिल्ली. आलें 160 रुपया जाल्यार लसूण 500 ते 550 रुपया कील आशिल्ली. लिंबू आकारा प्रमाण 3 ते 4 रुपयाक एक ह्या दरान विकताले. बीट 60 रुपया कील आशिल्लो.

मेथी 20 रुपया, शेपू 20 रुपया, पालक 10 रुपया, कांद्याची पात 10 रुपया, जाल्यार तांबडी भाजी 15 रुपया, कोथमीर 15 रुपया, ओटेलावांची एक जुडी 10 रुपयाक मेळटाली. तांतयां 75 ते 80 रुपया डझन ह्या दरान विकताले. सोमारा फलोत्पादन मंडळाच्या गाड्यांचेर भेंडो 40 रुपया, कोबी 20 रुपया, फ्लॉवर 25 रुपयाक एक नग, गाजर 50 रुपया, वालपापडी 50 रुपया, मिरसांग 50 रुपया, कांदो 43 रुपया, बटाट 33 रुपया जाल्यार टमाटां 16 रुपया कील आशिल्ली.