भांगरभूंय | प्रतिनिधी
पणजी: फाटल्या सप्तकाचे तुळेन सोमारा पणजी बाजारांत भाजयांच्या दरांनी परतून वाड जाली. गाजराचे दर 40 रुपयांनी वाडून 10 रुपया कील जालें. कांद्याचे दर 10 रुपयांनी वाडून 70 रुपया कील जालें. मेथीची एक चुडी 10 रुपयांनी वाडून 35 रु. जाल्यार पालक पांच रुपयांनी वाडून 15 रुपया चुडी जाली. कोबी 60 रुपया कील जाला.
सोमारा पणजी बाजारांत बटाटाचे दर 10 रुपयांनी उणें जावन 50 रुपया कील जाले. शंबरी मेरेन पाविल्ल्या टमाटाचे दर 20 रुपयांनी उणे जावन 60 रुपया कील जाले. वालपापडीचे दर 20 रुपयांनी उणे जावन 160 रुपया कील जाले. आयतारा कोथमिरेचे दर 50 रुपयांनी चुडी जाल्ली. पूण सोमारा ती उणी जावन 30 रुपया चुडी जाली. फ्लॉवराचो एक नग 60 रुपयांनी आशिल्लो. जाल्यार शेवगो 160 रुपया कील आशिल्लो.
सोमारा मध्यम आकाराचे 3 लिंबू 20 रुपयांनी विकताले. भेंडो 10 रुपयांनी उणो जावन परतून 80 रुपया कील जालो. काकडी 50 रुपया कील आशिल्ली. दुदयाचे दर फाटल्या सपतका प्रमाण 60 रुपया कील आशिल्ले. ढब्बू मिरसांग आनी मिरसांग दरेकी 120 रुपया कील आशिल्ली. आलें 180 रुपया जाल्यार लसूण 600 रुपया कील दरान विकताले. कारातें, घोसाळें, गवार, वायंगे दरेकी 80 रुपया कील दरान विकताले.
बाजारांत तांबडी भाजी 15 रु., शेपू 25 रुपया जाल्यार कांद्याची पात 10 रुपया एक चुडी ह्या दरान विकताले. फलोत्पादन मंडळाच्या गाड्यार कांदो 65 रु., बटाट 45 रु., टमाट 50 रु., वालपापडी 95 रु., मिरसांग 52 रु., भेंडो 48 रु., गाजर 85 रु. जाल्यार कोबी 51 रुपया प्रती कील दरान विकताले. फ्लॉवराच्या एका नगाचो दर 45 रुपया आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
