भांगरभूंय | प्रतिनिधी
नवी दिल्ली, खबरां संस्थाः मासाहारी थाळयेचो दर शिवराक थाळये परस दुपेट आसता, पूण फाटल्या सप्टेंबरांत ताचे उरफाटें जालें. कांदो, बटाट आनी टोमॅटो हांचे दर वाडिल्ल्यान शिवराक थाळयेचे सरासरी दर ११ टक्क्यांनी वाडलें, जें घरगुती चिकन थाळये परस चड आसात.
शुक्रारा उजवाडाक आयल्ल्या ‘क्रिसिल मार्केट इंटेलिजन्स’ ह्या अहवालांत शिवराक खाणांचो खर्च वाडपा फाटलीं कारणां सांगल्यांत. कांदो आनी बटाट्याचें उत्पादन उणें जाल्ल्यान सप्टेंबरांत ताचे सयत टोमॅटोचे दर अनुक्रमान ५३ टक्के, ५० टक्के आनी १८ टक्क्यांनी वाडले. उटंगाराच्या पावसाचो परिणाम आंध्र प्रदेश आनी महाराष्ट्रांतल्या टोमॅटो उत्पादनाचेर जाला. भाजयेचे दर वर्सुकी तत्त्वाचेर न्हय तर पयलींच्या म्हयन्याच्या तुळेंतय ते वाडल्यात.
शिवराक थाळयेचे दर सप्टेंबर २०२३ वर्सा २८.१ रुपया आशिल्लें तें अंदू सप्टेंबर २०२४ वर्सां ११ टक्क्यांनी वाडून ३१.३ रुपया जाल्यात. जाल्यार हाचे पयलींच्या म्हयन्यात ऑगस्टांत शिवराक थाळी ३१.२ रुपया आशिल्ली. थाळयेच्या दरांत ३७ टक्के वांटो आशिल्ल्या भाजयांचे दर वाडिल्ल्यान शिवराक थाळी चड म्हारग जाल्या. तेच बरोबर दाळींचे उत्पादन उणें जाल्ल्यान वर्सुकी तुळेंत ताचे दरय १४ टक्क्यांनी वाडल्यात. मासाहारी थाळी विशीं ५० टक्के वांटो आशिल्ल्या चिकनाचे दर १३ टक्क्यांनी उणे जाल्ल्यान मासाहारी थाळीचें दर २ टक्क्यांनी देंवून ५९.३ रुपया जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
