भांगरभूंय | प्रतिनिधी
मुख्यमंत्री डॉ. प्रमोद सावंत एक्सिस बँकेतूच बँक खातीं उघडपाचे निर्देश दिवपी परिपत्रक बेगीनूच फाटीं घेवचें
मडगांव, प्रतिनिधी : एक्सिस बँकेतूच बँक खातीं उघडपाचे निर्देश दिवपी शिक्षण खात्यान शाळा आनी शिक्षण संस्थांक जारी केल्लें परिपत्रक हें भाजप सरकाराच्या खाजगी बँकांक उर्बा दिवपी आनी राष्ट्रीयकृत बँको सोंपोवपी धोरणाचो पुरावो जावन आसा. मुख्यमंत्री डॉ. प्रमोद सावंत हांणी हें परिपत्रक बेगीनूच फाटीं घेवचें अशी मागणी विरोधी पक्ष फुडारी युरी आलेमाव हांणी केल्या.
शाळा आनी शिक्षणीक संस्थांक फकत एक्सिस बँकेंत खातीं उघडपाचे निर्देश शिक्षण खात्यान जारी केल्यात. हाचेर विरोधी पक्ष फुडारी युरी आलेमाव हांणी टिका केली. हें परिपत्रक एक्सिस बँके कडेन संबंदीत आशिल्ल्या भाजप फुडार्यांच्या घरकान्नींचें मार्केटिंग लक्ष्य सुरळीत करपा खातीर आसा, असो दावो तांणी केला. हेर बँकांचे तुळेंत सरकार आनी त्यो सगळ्यो शाळो आनी संस्थांक एक्सिस बँके कडल्यान हेर कसले फायदे मेळटले? असो प्रस्न करून सरकारान फकत एक्सिस बँकूच कित्याक वेंचून काडली हें मुख्यमंत्री डॉ. सावंत हांणी स्पश्ट करचें, अशी मागणी तांणी केली.
शाळा आनी संस्थांक तांचे आवडीचें बँक खातें दवरपाक परवानगी दिवपांत कितें आडखळ आसा? राष्ट्रीय बँकांची खांकनवाळ अवस्था जाल्यार ताची जापसालदारकी कोण घेतलो? ह्या म्हत्वाच्या प्रस्नांच्यो जापो दिवपाची गरज आसा अशें युरी आलेमाव हांणी म्हणलें.
सगळ्यां बँकांनी विशेश म्हळ्यार राष्ट्रीयीकृत बँकांनी ऑनलायन वेव्हाराची सुविधा आसा. हातुंतल्या खंयच्याय बँके वरवीं मुख्यमंत्री गुरुदक्षिणा येवजण राबोवं येता. भाजप फुडार्यांच्या बायलांच्या लिपिल्ल्या सुवार्थाक लागून सरकार शाळा आनी संस्थांचेर एक्सिस बँकेत बँक खातीं उघडपा खातीर चेंपण हाडटा, असो आरोप आलेमांव हांणी केलो.
शिक्षण संचालकांनी शासनाच्या चेंपणाक बळी पडून खाजगी वाठारांतल्या बँकांक उर्बा दिवपी परिपत्रका जारी करचीं न्हय. ह्या बँकांनी कितेंय फटींगपणां जाल्यार ताची जापसालदारकी संचालकांचेर आसतली अशी शिटकावणी युरी आलेमाव हांणी दिली. खातें उगडपा खातीर बँको वेंचून काडपाची जापसालदारकी शाळा आनी संस्थांचेर सोडपाक जाय अशें आलेमाव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
