भांगरभूंय | प्रतिनिधी
पणजी : म्हादयची पळोवणी करपा खातीर आमी कर्नाटकच्या सभापतीं कडल्यान परवानगी मागपाक शकना, अशे गोंयचे सभापती रमेश तवडकार हांणी स्पश्ट केल्ल्यान विरोधी पक्ष फुडारी युरी आलेमाव हांणी भाजप सरकार उदकाच्या प्रस्नाचेर वेळ वगडायता अशी टिका केल्या.
‘‘सभापती रमेश तवडकार हांच्या वक्तव्याक लागून म्हादय प्रस्नाचेर वेळ वगडावपी अकार्यक्षम भाजप सरकाराचो पर्दाफाश जाला. उदक वळोवपाच्या प्रकरणांत हस्तक्षेप करपाचो अधिकार नाशिल्ल्याचें सांगून भाजप सरकारान आपली अकार्यक्षमताय दाखोवन दिल्या. गोंयचें जिवीत आशिल्ल्या म्हादय प्रस्नाचें तांकां कांयच पडून वचूंक ना, अशें आलेमाव हांणी म्हणलां.
जलस्रोत मंत्री सुभाष शिरोडकार हांणी ८ जानेवारीक सभागृह समितीची दुसरी बसका घेतिल्ली. म्हादय तशेंच प्रकल्प स्थळांची पळोवणी करपा खातीर कर्नाटकच्या सभापतींक पत्र बरोवन मान्यताय दिवपाची मागणी करतले, अशें म्हणिल्लें. ह्या विधानाचो उगडास करून दितना युरी आलेमाव हांणी, सध्या सभापतींनी जी भुमिका घेतल्या ती पळयल्यार भाजप सरकार उक्तें जालां, अशें म्हणलां.
सभागृह समिती कडल्यान आपल्याक कसलेच तरेचें पत्र येवंक नाशिल्ल्याचें सभापती तवडकर हांणी प्रसारमाध्यमांक सांगलें. म्हादय वादाच्या प्रकरणांत आपली कसलीच भुमिका नाशिल्ल्याचें तांणी स्पश्ट केलें. हाचो अर्थ भाजप सरकार वेळ वगडायता, असो आरोप युरी आलेमाव हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
