भांगरभूंय | प्रतिनिधी
पणजी : केंद्रांतल्या भाजप सरकाराक लागून देशाचें संविधान धोक्यांत आसा. हाका लागूनच ७५ वर्सां उपरांत कॉंग्रेसीक देशभर संविधान बचाव अभियान सुरू करचें पडलें. भाजपच्या फुडार्यांनी पयलीं म. गांधी, उपरांत पं. नेहरू आनी आतां डॉ. बाबासाहेब आंबेडकर हांकां लक्ष्य करपाक सुरवात केल्ल्याचें कॉंग्रेस प्रदेशाध्यक्ष अमित पाटकार हांणी म्हणलें.
प्रजासत्ताक दिसा निमतान प्रदेश कॉंग्रेसीन राज्यांत संविधान यात्रा सुरू केली. त्या निमतान आयोजीत कार्यावळींत ते उलयताले. कॉंग्रेस प्रभारी माणिकराव ठाकरे, प्रभारी सचीव डॉ. अंजली निंबाळकार, विरोधी पक्ष फुडारी युरी आलेमाव, आमदार एल्टन डिकॉस्टा, कार्लुस फेरेरा आनी हेर हजर आशिल्ले.
राष्ट्रीय स्वयंसेवक संघाचे (आरएसएस) विचारसरणीक डॉ. आंबेडकरांनी सदांच विरोध केला. हाका लागूनच भाजपान आंबेडकरांक लक्ष्य करपाक सुरू केलां. इतलेंच न्हय तांणी बरयिल्लें संविधान बदलपाचे यत्नूय भाजपाच्या फुडार्यांनी केल्यात. हाका लागूनच भाजपान लोकसभा वेंचणुकेंत ४०० पारचो नारो दिलो. मात, देशांतले सूज्ञ जनतेन भाजपाचो हो डाव उधळ्ळो, अशें पाटकार हांणी मुखार सांगलें.
कॉंग्रेसीच्या धोरणाक लागून गोंयांक उसरां मुक्ती मेळ्ळी. तेन्नाच्या कॉंग्रेस सरकारान संविधानांत ७३ दुरुस्त्या केल्ल्याचो दावो मुख्यमंत्री डॉ. सावंत करतात. मात, कॉंग्रेस सरकाराक हें कित्याक करचें पडलें हाचो अभ्यास मुख्यमंत्र्यांनी केन्नाच करूंक ना. देशाक स्वातंत्र्य मेळ्ळें तेन्ना गोंयांत पुर्तुगेजांची सत्ता आशिल्ली. पुर्तुगीज ‘नाटो’चे संस्थापक आशिल्ल्यान तेन्नाच गोंयांक स्वातंत्र्य दिवपाचो यत्न केल्लो जाल्यार तिसरें महायुद्ध पेटपाचें. हाका लागून नेहरूंनी संयम दवरीत ‘नाटों’त अमेरिकेचें वर्चस्व वाडयले उपरांत गोंयांक पुर्तुगेजांच्या चपक्यांतल्यान मुक्त केलें, अशें पाटकार हांणी सांगलें. कॉंग्रेस सरकारान गरजेचें आसलें तेन्नाच संविधानांत सुदारणा केली. गोंयांक मुक्ती, घटक राज्याचो दर्जो मेळ्ळे उपरांत, कोंकणीक राजभाशेचो दर्जो मेळ्ळे उपरांत संविधानांत दुरुस्त्यो करप गरजेचें आशिल्लें. त्यो मुख्यमंत्र्यांक नाका आशिल्ल्यो काय? असो प्रस्न पाटकार हांणी विचारलो.
राज्यांतले भाजप सरकार गोंयकारांच्यो गरजो पुराय करपाक अपेशी थारता. बेरोजगारींत गोंय देशांत पयले सुवातेर आसा. भलायकी मळार गोंय फाटीं पडटा. तरीय मुख्यमंत्री पुरायेन उदरगत करपाचीं बातां मारता, अशी टिका तांणी केली. येवपी विधानसभा वेंचणुकेंत कॉंग्रेसीक २५ परस चड सुवातो मेळटल्यो, असो विस्वासूय पाटकार हांणी उक्तायलो.
ह्या वेळार हजर आशिल्ल्या हेर मानेस्तांनी मनोगत उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
