भांगरभूंय | प्रतिनिधी
आप मतविभागणी खातीरूच वेंचणूक
मडगांव : जिल्लो पंचायत वेंचणुकेंत भाजप पयशे आनी कार्यकर्त्यांचो वापर विरोधी पक्ष फोडपा खातीर करता. तशेंच आप पक्षबदलूंचें सहकार्य घेवन वेंचणुकेंत वांटेकार जाता. अरविंद केजरीवाल जरी गोंयांत आयले तरी फरक पडचो ना. अधिकार नासतना जिल्लो पंचायत वेंचणुकेंत व्हड फुडारी प्रचारांत वाटो घेतात, हाचो अर्थ तेय मतविभागणी खातीर आयिल्ल्याची शक्यताय आसा, अशें आमदार विजय सरदेसाय हांणी म्हणलें.
फातोड्डेंच्या उदरगतीच्या उक्तावणा उपरांत प्रसारमाध्यमां कडेन उलयतना सरदेसाय हांणी भाजप आनी आपचेर टिका केली. गोवा फॉरवर्ड णव मतदारसंघांत वेंचणूक लढयतात. केजरीवाल गोंयांत प्रचारा खातीर आयले म्हणून गोवा फॉरवर्डचेर परिणाम जावचो ना. तांचे वरीश्ठ फुडारी तांकां सोडून वतात. आपच्यो आतिशी हांगा रावन काम पळयता. तांणी पक्षबदलूंचीय मजत घेतल्या. बाबाशान हांचे कडल्यान आपच्या उमेदवाराक फाटबळ दिलां ताचेर कोणूच कांयच उलयना. ते पक्षबदलूंची मजत घेतात आनी पक्षबदलूंक घेवचे नात अशें एके कडेन सांगतात.
कॉंग्रेस आनी गोवा फॉरवर्डचे युतीचें सरकार जाल्यार आरडीए कडची निधी जिल्लो पंचायतीकडेन वळयतले, हें आस्वासन दिलां. जिल्लो भवन उबारतले आनी ताच्या बांदकामाचे पयशे खावपाचो आमचो उद्देश ना. जाल्यार जिल्लो पंचायतीक कायद्या प्रमाण तांचे हक्क आनी अधिकार दिवपाचे यत्न आसतले, अशें विजय सरदेसाय हांणी म्हणलें.
बर्च क्लबाच्या उज्यांत २५ जाणांचो बळी गेलो, हाचे कडल्यान दुसरे कडेन लक्ष वळोवपा खातीर जिल्लो पंचायत वेंचणुकेचो वापर करतात. नायट क्लबाक परवानगी दिवंकूच शकनासतनाय राज्यांत खुबशे नायट क्लब सुरू आसात. हातूंत सत्ताधारी पक्षाच्या फुडार्यांचोय आसपाव आसा. सरकारान आतां म्हजें क्लब येवजण हाडची, अशी टिका केली.
मनोज परब म्हणजे प्रँक
मनोज परब म्हणजे प्रँक आशिल्ल्यान तांचेर चड कितें उलोवप? तांणीच सांगलां, आपणें गोंयचे जनते कडेन प्रँक केला, गोंयच्या लोकांच्या भावनां कडेन खेळ्ळा. तांकां चड गंभीरपणान घेवपाची गरज ना. ते युती खातीर गंभीर नाशिल्ले आनी प्रँक करप्यां वांगडा युती कशी जातली, अशें सांगून आमदार विजय सरदेसाय हांणी रिव्हॉल्युशनरी गोवन्स पक्ष युती खातीर इत्सुकच नाशिल्लो अशें सांगलें.
वेंचणुके खातीर नोकरी, बेकायदो बांधकामांच्या मुद्याचो वापर
खंयच्योय वेंचणुको आयले उपरांत भाजप सरकारी नोकर्यो आनी बेकायदो बांदकामां नियमीत करपाचो मुद्दो वयर काडटा. वेंचणुकां खातीर हाचो फायदो करुन घेता हें २०१२ पसूनचे वेंचणुकेंत दिसून येता. नोकर्यांच्यो जायराती काडपाच्यो आनी तांची विक्री करपाची, हे खातीर मंडळांचो वापर मार्केटींग युनिटसारखा करपाचो हें भाजप कडल्यान चालूच आसा, अशें आमदार सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
