भांगरभूंय | प्रतिनिधी
ढवळीकार हांणी केलो गुदिन्हो हांच्या विधानाचो खर शब्दांनी निशेध
पणजी: गोंयच्या सत्ताधारी भाजप-मगो युतींत सध्या शाब्दीक झूज रंगिल्ल्याचें पळोवपाक मेळटा भाजपाचे ज्येश्ठ मंत्री माविन गुदिन्हो हांणी मगो पक्षाचे आमदार जीत आरोलकार हांकां भाजपांत येवपाचो उलो मारिल्ल्याचें मगो पक्षाक बरेंच माल पडलां. मगो पक्षाचे केंद्रीय समिती अध्यक्ष दीपक ढवळीकार हांणी मंत्री गुदिन्हो हांच्या विधानाचो खर शब्दांनी निशेध केला. माविन हांणी मगो पक्षाचे कार्यकर्ते आनी मतदारांक कारणाशिवाय डिस्टर्ब केलां, असो आरोप केला.
ढवळीकर हांणी माविन हांच्या राजकीय इतिहासाचेर बोट दवलां. माविन गुदिन्हो हें पांच पक्ष भोंवून आयिल्ले फुडारी.तांणी दुसर्यांक पक्षनिष्ठेचे धडे दिवपाची गरज ना, अश्या शब्दांनी तांणी आपली तिडक उक्तायली. मावीन हांणी फोड्यां एके कार्यावळींत जित आरोलकार हांणी भाजपाचे तिकेटीचेर वेंचणूक लढोवची, अशें म्हणलें. ह्या विधानाक लागून मगोच्या कार्यकर्त्यांमदीं संभ्रमाचें वातावरण निर्माण जालां, ढवळीकर हांणी स्पश्ट करतना म्हणलें, खुद्द जित आरोलकार हांणी तांका आपूण मगो पक्षाच्याच तिकेटीचेर ठाम आशिल्ल्याचें सांगलें.
दीपक ढवळीकार हांणी, जेन्ना भाजप आनी मगोची अधिकृत युती आसा, तेन्ना भाजपाच्या ज्येश्ठ फुडार्यांनी आनी मुख्यमंत्र्यांनी अशे तरेचीं वक्तव्यां करपी मंत्र्यांचेर नियंत्रण दवरूंक जाय. वेंचणुकेचें वारें मारतना युतीच्या घटक पक्षाच्या आमदाराक आपल्या पक्षांत ओडपाचें विधान करप हें युती धर्माच्या आड आशिल्ल्याचें तांणीनमूद केलें. जीत आरोलकार हांचे कडेन आपले संबंध बरे आसात. ते पक्षाचो आनी पक्षाच्या ज्येश्ठ फुडार्यांचो मान राखतात. जर माविन हांकां इतलीच आवड आसा जाल्यार तांणी स्वताच्या पक्षाच्या कामाचेर लक्ष केंद्रीत करचें असोय सल्लो तांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
