भांगरभूंय | प्रतिनिधी
जि. पंचायतींत 80 टक्के नवे उमेदवार
प्रदेशाध्यक्ष दामू नायक हांची म्हायती
4 दिसांत जातली उमेदवारांची घोशणा
भांगरभूंय । प्रतिनिधी
पणजी : जिल्हो पंचायत वेंचणुके खातीर भारतीय जनता पक्ष 80 टक्के नव्या चेऱ्यांक संद दितलो. उमेदवार जाहीर करपाची प्रक्रिया निमाण्या पावंड्यार पावल्या. चार दिसांत उमेदवार जाहीर जातले, अशी म्हायती प्रदेश भाजप अध्यक्ष दामू नायक हांणी दिल्या. आरक्षणाक लागून सुमार 70 टक्के उमेदवार वेंचणूक लडोवपाक अपात्र थारल्यात.
जिल्हो पंचायत वेंचणूक 13 डिसेंबराक जावपाची आशिल्ली. वेंचणूक एक सप्तक फुडें धुकलपाचो निर्णय सरकारान घेतला. पंचायत सचिवांनी 20 डिसेंबराक जिल्हो पंचायत वेंचणूक घेवपाचो आदेश जारी केला. प्रकरण न्यायालयांत आशिल्ल्यान राज्य वेंचणूक आयोगान अजून मेरेन अधिसुचोवणी जारी करूंक ना. आरक्षणाक हरकत घेवपी याचिकेचेर 25 नोव्हेंबराक सुनावणी जातली. हाचे उपरांत आचारसंहिता लागू जावपा सयत वेंचणुकेची सविस्तर कार्यावळ जाहीर जातली.
वेंचणूक 13 डिसेंबराक जातली हें मतींत घेवन सगल्या राजकी पक्षांनी उमेदवारांची निवड प्रक्रिया सुरू केल्ली. मात वेंचणूक सप्तकभर फुडें गेल्ल्यान उमेदवार निवड प्रक्रियेक ब्रेक बसला. भारतीय जनता पक्षाचो विचार केलो जाल्यार उत्तर गोंयचे उमेदवार वेंचपा खातीर म्हापश्यां बसका जाली. हे बसकेक प्रदेश भाजप अध्यक्ष दामू नायक, मुख्यमंत्री डॉ. प्रमोद सावंत, दत्ता खोलकार तशेंच हेर फुडारी हाजीर आशिल्ले. हे बसकेंत इत्सूक उमेदवारांचीं मतां फुडाऱ्यांनी जाणून घेतलीं. हाचे उपरांत पणजेंत सुकाणू समितीची बसका जाली. हे बसकेक मुख्यमंत्री डॉ. प्रमोद सावंत, आदले मंत्री चंद्रकांत कवळेकार, अध्यक्ष दामू नायक आनी हेर वांगडी हाजीर आशिल्ले.
उमेदवारांचो वावर, लोकसंपर्क, जिखपाची तांक आनी पक्षनिश्ठा ह्या निकशाचेर निवड जातली. ह्या निकशांचो विचार केलो जाल्यार 80 टक्के नव्या उमेदवारांक संद मेळटली. उमेदवारांची निवड करपाची पक्षाची पद्दत आसता. इत्सुकांच्या नांवांचेर पदाधिकारी चर्चा करतात. कार्यकर्त्यांचीं मतां घेता. जिखून येवपाचे तांकी विशीं पक्षाचें सर्वेक्षण जाता. ह्या सगल्या गजालींचेर उमेदवारांची निवड थारता. निवड प्रक्रिया आतां निमाण्या पावंड्यार पावल्या, अशें दामू नायक हांणी सांगलें. आम आदमी पक्षान सगल्यांत पयलीं उमेदवार जाहीर केल्या. शुक्रारा आपान उमेदवारांची दुसरी वळेरी जाहीर केली. काँग्रेसची मात गोवा फॉरवर्ड आनी आरजी कडेन युती विशीं चर्चा चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
